சேவகனுக்கு பிறகு முதல்வன் வரை அர்ஜுன் எனது ஃபேவரைட் ஹீரோவாக இருந்தார் . அவருடைய 150 வது படத்தை மிஸ் செய்யக்கூடாது என்பதற்காகவே படத்தை பார்த்தாகி விட்டது . எண்ணிக்கையையும் தாண்டி சோலோ ஹீரோவாக அர்ஜுனுக்கு நீண்ட நாட்கள் கழித்து நிறைவான படம் ...
சென்னையில் தொடர் கொலைகள் . ஒவ்வொரு கொலையிலும் அடுத்த கொலைக்கான க்ளூவை விட்டு செல்கிறான் சீரியல் கில்லர் . சிஐடி டிஎஸ்பி ரஞ்சித் காளிதாஸ் ( அர்ஜுன் ) தனது திறமைக்கே நேரடியாக சவால் விடும் அந்த சீரியல் கில்லரை தனது டீமுடன் ( பிரசன்னா & வரலக்ஷ்மி ) எப்படி கண்டு பிடிக்கிறார் என்பதை நிதானமாக அதே சமயம் விறுவிறுப்பு குறையாமல் சொல்வதே நிபுணன் ...
ஆக்சன் கிங் அர்ஜுன் முதல் சீனிலேயே ஐந்து நிமிடங்களுக்குள் நான்கு பேரை போட்டுத் தள்ளி வேலையை தொடங்கி விடுகிறார் . வயதானாலும் தனக்கேயுரிய ஸ்டைலிஷ் நடை , உடல் மொழி , ஃபைட் இவற்றால் கவர்கிறார் . உடற்கட்டு இளமையாக இருந்தாலும் ரொமான்ஸ் காட்சிகளில் முகம் வயதை காட்டிக் கொடுக்கிறது . அதுவும் சில சீன்களில் மனைவியே மகள் போல தெரிவது குறை . நடுநடுவே வந்து போகும் காதல் காட்சிகள் திரில்லர் படத்துக்கு வேகத்தடை ...
பிரசன்னா " ஜட்டிக்குள்ள பாம வைக்கணும் " என்று சொல்லும் போது தியேட்டரே அதிர்கிறது . இவரை இன்னும் நன்றாக உபயோகப் படுத்தியிருக்கலாமோ என தோன்றுகிறது . வரலக்ஷ்மி தொப்பையுடன் துறுதுறு போலீசாக நல்ல தேர்வு . அர்ஜுனின் தம்பி யாக வரும் வைபவுக்கு பெரிய ஸ்கோப் இல்லை . யாரும் எதிர்பார்க்காத ஒருவரை வில்லனாக போட்டது படத்தின் யுஎஸ்பி . ஆனால் அதற்கேற்ற வெயிட்டேஜ் அவர் கேரக்டருக்கு இல்லாதது குறை . அதுவும் க்ளைமேக்சில் ஓவராக பேசி ஹீரோவிடம் அடி வாங்கும் வழக்கமான வில்லன் ...
முதல் பதினைந்து நிமிடங்களுக்கு பிறகு படம் நம்மை நன்றாக உள் வாங்குகிறது . நடுநடு வே வரும் காதல் காட்சிகளை தவிர்த்து பார்த்தால் இண்டெர்வெல் வரை படம் வேகம் . வேறு வேறு ஆட்களின் கொலையில் அவர்களை சம்பந்தப்படுத்தும் நாட் நன்றாகவே இருக்கிறது . ஆனால் இரண்டாம் கொலையிலேயே அர்ஜுன் அதை நெருங்கியிருக்கலாம் . ஏனோ ஒத்திப் போட்டிருக்கிறார்கள் ...
பின்னணி இசை , ஒளிப்பதிவு எல்லாமே ஒரு க்ரைம் த்ரில்லருக்கான பக்க பலம் . ப்ளாஷ்பேக் கை வழவழ வென்று இழுக்காமல் ஷார்ட் அண்ட் ஸ்வீட் டாக முடித்தது சிம்பலி சூப்பர்ப் . கொலைக்கான மோட்டிவ் ஓகேவென்றாலும் அழுத்தம் குறைவதாகவே படுகிறது . கொலை செய்து விட்டு மாஸ்க் போட்டு விடுவது , மெத்தட் ஆஃப் இன்வெஸ்டிகேஷன் எல்லாம் சில ஹாலிவுட் படங்களை நினைவு படுத்துகின்றன . சிற்சில குறைகளை தவிர்த்து விட்டு பார்த்தால் ஸ்லோ அண்ட் ஸ்டெடியாக செல்லும் இந்த நிபுணன் நிறைவையே தருவான் ...
ரேட்டிங் : 3 * / 5 *
ஸ்கோர் கார்ட் : 42
No comments:
Post a Comment