13 January 2019

பேட்ட - PETTA - பரட்டயிஸம் ...


சிவாஜி க்கு பிறகு பக்கா மாஸ் படம் ரஜினிக்கு வரவில்லை . கபாலி கொஞ்சம் நெருங்கி வந்தாலும் சாதீய வசனங்களால் அனைவராலும் ரசிக்கப்படவில்லை . இந்த நேரத்தில் டை ஹார்ட் ரஜினி ரசிகர் , இளம் இயக்குனர் கார்த்திக் சுப்புராஜுடன் ரஜினி கை கோர்த்திருப்பது எதிர்பார்ப்பை ஏற்றிவிட்டது . அதை அவர் தீர்த்து வைத்தாரா ? பார்க்கலாம் ...

பிரதமர் அலுவலக ரெக்கமெண்டேஷனில் ஒரு காலேஜ் வார்டனாக காளி 
( ரஜினி ) சேருகிறார்  . அங்கு நடக்கும் ராக்கிங் , கான்டீன் காண்ட்ராக்ட் அடாவடிகளை தன் அடிதடியால் அடக்குகிறரார் . அவர் உண்மையிலேயே அங்கு சேர்ந்தது ஒரு மாணவனை எதிரிகளிடமிருந்து காப்பாற்றுவதற்காகத்தான் என இண்டெர்வெல்லில் தெரிகிறது . பிஎம்ஓ ரெக்கமெண்டில் வந்ததால் சப்ஜெக்ட்  சீரியஸாக இருக்கும் என்று பார்த்தால் கடைசியில் வெறும் லவ் மேட்டராக வைத்து ஃபர்ஸ்ட் ஆஃபில் கொடுத்த  மரண பில்ட் அப் பை செகண்ட் ஆஃபில் படுக்க வைப்பதே பேட்ட ...


சூப்பர் ஸ்டார் இந்த வயதிலும் அவ்வளவு இளமையாக , அதே ஸ்டைலோடு துடிப்பாக இருக்கிறார் , தேங்க்ஸ் டு கேமரா , காஸ்டியூம் & மேக்கப் டீம் . அடியாட்களை அடித்து ஓட விடும் முதல் சீனிலிருந்து குட்டிக்கதை சொல்லி படத்தை முடிக்கும் க்ளைமேக்ஸ் வரை நிச்சயம் ரஜினி மரண மாஸ் . ஒவ்வொரு ஃப்ரேமிலும் சூப்பர் ஸ்டாரை  கார்த்திக் & திரு ரசித்து செதுக்கியிருக்கிறார்கள் . அவருடன் இழையோடும் அந்த இன்னொசன்ஸை இந்த படத்தில் பல வருடங்கள் கழித்து காண முடிகிறது ...

சிம்ரன் கொஞ்ச சீன்களில் வந்தாலும் கிறங்க வைக்கிறார் . சசிகுமார் , திரிஷா படத்தில் இருக்கிறார்கள் . விஜய் சேதுபதி ரஜினிக்காக இந்த வேடத்தில் ஒத்துக்கொண்டிருப்பார் . சதமடிக்கும் பெரிய மேட்ஸ்மேனுக்கு முன்னாள் வேகமாக முப்பது ரன் அடிக்கும் சின்ன பேட்ஸ்மேன் போல அவர் நிலைமை . செம்ம வில்லன் நவாஸுதீன் சித்திக்கை வடக்கிலிருந்து கூட்டி வந்து மொக்கை செய்திருக்கிறார்கள் . அவருக்கு ஈக்குவலான ரோல் கொடுத்து பயன்படுத்தியிருந்தால் படம் வேற லெவெலில் இருந்திருக்கும் ...

அனிருத் " மரண மாஸ் " , " உல்லாலா " பாடல்களில் உருக வைக்கிறார் . பிஜிஎம் மும்  பட்டையை கிளப்புகிறது . படத்தில் இன்னொரு ஹீரோ ஒளிப்பதிவாளர் திரு . ஊட்டி , உ.பி எல்லாமே அவர் லென்ஸ் வழியாக கொள்ளை அழகு . இந்த வயதிலும் ரஜினி போடும் சண்டைகளை ரசிக்க வைத்திருக்கும் பீட்டர் ஹைனுக்கு பாராட்டுக்கள் ...


அநியாயம் நடக்கும் இடத்துக்கு ஹீரோ ஆஜர் ஆகிறான் , எதிரிகளை துவம்சம் செய்கிறான் என்று பக்கா மாஸ் என்டெர்டைனராக நகரும் முதல் பாதி படத்துக்கு ப்ளஸ் . ரஜினி - சிம்ரன் காதல் காட்சிகள் , பாபி சிம்ஹாவின் அடாவடி , ஹாஸ்டலை கைக்குள் கொண்டு வரும் ரஜினியின் ஹீரோயிசம் எல்லாமே நம்மை கட்டிப்போடுகின்றன . ரசிகனின்  பல்ஸை கரெக்டாக பிடித்து முதல் பாதியை நகர்த்தியிருக்கிறார்  கார்த்திக் சுப்புராஜ் . இரண்டாம் பாதியில்  பழைய டிவிடிக்கள் நிறைய பார்த்த எஃ பெக்ட் ...

தன் முஸ்லீம் நண்பன் மாலிக் ( சசிகுமார் ) மதுரையில் பெரிய இந்து சாதி பெண்ணை கரம் பிடிக்க ரஜினி உதவுவதும் , அந்த பெண்ணின் அண்ணன்காரன் இவர்களை பழி வாங்க துரத்தும் வழக்கமான காதல் தான் கதையின் மையப்புள்ளி என தெரியும் போது சப்பென்று ஆகி விடுகிறது . இத்தனை வருடங்கள் ஹீரோ , வில்லன் என்ன செய்தார்கள் என்ற கேள்விக்கெல்லாம் விடையில்லை ...

இரண்டாம் பாதியில் விஜய் சேதுபதி வருவதால் படம் கொஞ்சம் ஒப்பேறுகிறது . முஸ்லீமை நண்பனாகவும் , வில்லனை சாமி பக்தியுள்ள இந்துவாகவும் காட்டியதால் அதை சமன் செய்வது போலவோ என்னமோ  ரஜினி ராமர் கதை சொல்லி படத்ததை  முடிக்கிறார் . க்ளைமேக்ஸ் ட்விஸ்ட் கூட ஆச்சர்யத்தை தருவதை விட ரஜினி கேரக்டர் மேல் கோபத்தையே தருகிறது . படத்தின் நீளம் , குறிப்பாக இரண்டாம்  பாதியில் கொஞ்சம் பொறுமையை சோதிக்கிறது . இப்படி சில குறைகள் படத்தை பின்னுக்கு இழுத்தாலும் அதையெல்லாம் மறந்து பேட்டயை பார்க்க வைப்பது பரட்டையிஸம் ...

ரேட்டிங்   : 3.25 * / 5 * 

ஸ்கோர் கார்ட் : 43


12 January 2019

விஸ்வாசம் - VISHWASAM - தல பாசம் ...


சிறுத்தை சிவா வோட சேர்ந்து நாலாவது படமா என்கிற அயர்ச்சியை மாற்றி படத்தை பார்க்க தூண்டியது  சால் அண்ட் பெப்பர் லுக் இல்லாமலும் வருகிற யங் அஜித்தின் எனெர்ஜி . இன்டர்நேஷனல் லெவெலுக்குல்லாம் படம் நமக்கு சரிப்படாது என்பதை உணர்ந்து சிவா விவேகமாக வீரத்தோடு கொஞ்சம் வேதாளத்தையும் கலந்து கொடுத்தது  விஸ்வாசம் ...

தேனி மாவட்டத்தின் பெரிய தலைக்கட்டு தூக்குதுரை ( அஜித்குமார் ) , பத்து வருடங்களாக பிரிந்திருக்கும் மனைவி நிரஞ்சனா ( நயன்தாரா ) , மகள் ஸ்வேதா (அங்கிதா) இருவரையும் திருவிழாவிற்கு அழைக்க மும்பை செல்கிறார் . எந்த அடிதடியால் குடும்பத்தை பிரிந்தாரோ அதே அடிதடியால் மும்பையில் மகளை காப்பாற்றி மீண்டும் குடும்பத்தோடு இணைவதே விஸ்வாசம் . சுருக்கமாக சொன்னா காதலித்த பெண்ணின் குடும்பத்துக்காக அடிதடி பண்ணா வீரம் , தன் குடும்பத்துக்காக பண்ணா விஸ்வாசம் ...


அஜித் ஸ்டைலாக நடப்பார் , பைக் ஓட்டுவார் என வழக்கமாக இல்லாமல் அவரின் காமெடி அண்ட் செண்டிமெண்ட் நடிப்பு படத்துக்கு ஹைலைட் . ஒபெனிங் சீனில் ஃபைட் இல்லாமலேயே மாஸ் காட்டியிருப்பது நைஸ் . ஃப்ரேம் பை ஃப்ரேம் அஜித் இருந்தாலும் கொஞ்சம் கூட சலிக்காதது தான் 
தலயின் ப்ளஸ் .  ஆக்சனை விட செண்டிமெண்ட் காட்சிகள் தூக்கலாகவே இருப்பதால் நிச்சயம் பெண்கள் மனதில் நல்ல இடம் பிடிப்பார் இந்த தூக்குதுரை ...

மாஸ் ஹீரோ படத்துக்கு டூயட்டுக்கு மட்டும் வந்து போகாமல் நல்ல வெயிட்டான கேரக்டரில் நயன்தாரா . உங்கள கட்டிபிடிக்கணும்னு தோணினா கைய பிடிப்பேன் என்று சொல்லும் இடத்தில் மனதில் இடம் பிடிக்கிறார் . இண்டெர்வெல்லை ஒட்டி வந்தாலும் செகண்ட் ஆஃப் முழுவதும் படத்தை டேக் ஆஃப் செயகிறாள் அங்கிதா . நயன்தாராவை விட அஜித் - அங்கிதா ஜோடி அப்பா மகளாக நல்ல கெமிஸ்ட்ரி . வில்லனாக வந்து ஹீரோவிடம் கடைசியில் அடிபட்டு சாகாமல் நல்ல அப்பாவாக மாறும் வேடத்தில் ஜெகபதி பாபு . யோகி பாபு , ரோபோ சங்கர் , தம்பி ராமையா கூட்டணி கிச்சுகிச்சு மூட்ட முயற்சி செயகிறார்கள் . விவேக் - கோவை சரளா படத்தில் இருக்கிறார்கள் . " அடிச்சு தூக்கு " பாடலில் ஆட வைக்கும் இமான் 
" ஆராரோ " பாடலில் கொஞ்சம் அழ வைக்கிறார் ... 


பொங்கலுக்கு குடும்பத்தோடு பார்க்கும்படியாக ஒரு யு சான்றிதழ் படத்தை கொடுத்திருக்கும் சிவா வுக்கு பாராட்டுக்கள் . அஜித் திடம் இருந்து ஆக்சனை தாண்டி நெகிழ்வான நடிப்பையும் வரவைத்து விக்ரமன் இல்லாத குறையை தீர்க்கிறார் சிவா . அஜித் சோல்டரிலேயே பயணித்தாலும் பெரிய நட்சத்திர பட்டாளத்தை சரியான விதத்தில் பயன்படுத்தியிருப்பது புத்திசாலித்தனம் .
ஆக்சன் , செண்டிமெண்ட் ரெண்டையும் சரியான விகிதத்தில் கலந்திருப்பது ப்ளஸ் . " ஒண்டிக்கு ஒண்டி வாடா " , " நேர்மையா இருக்கறது நம்ம திருப்திக்கு" , " அரசியல் பேசாத "  போன்ற வசனங்களால்  சர்க்காரை சீண்டியிருப்பது ரசிகர்களுக்கு விருந்து .இண்டெர்வெல் ப்ளாக்கில் நிமிர வைத்து விட்டு பின் நெகிழ மட்டும் வைப்பது நாட் இனஃப் ...

என்ன தான் கோபம் என்றாலும் புருஷனை விட்டு பத்து வருடம் மனைவி பிரிந்திருப்பதும் , மனைவி , மகளை பார்க்க எந்த முயற்சியும் எடுக்காமல் தூக்குதுரை தூங்கிக் கொண்டிருப்பதும் சறுக்கல் . ஆண்டனி இருந்தால் தான் பாட்சாவுக்கும் பலம் . இங்கே தூக்குதுரை யை பார்த்து எதிரிகள்  பம்முகிறார்கள் . மும்பை வில்லனுக்கும் வலுவான காரணங்கள் இல்லை . சோலோவாக அஜித் கிரௌண்டில் சிக்ஸராக அடித்துக்கொண்டிருப்பது போரடிக்கிறது . " தலையில் ரத்தக்கட்டு ,நார்மலாவது கடினம் " என்று டாக்டர் சொன்ன அடுத்த சீனிலேயே அஜித் சண்டை போடுவது சொதப்பல் . பாசம் எனும் நெய்யை அதிகமாக போட்டு நம்மை வழுக்க  வைக்காமல் அரிசி , நெய் , மிளகு, பருப்பு என எல்லாவற்றையும் சேர்த்து இன்னும் சுவையாக கொடுத் திருந்தால் விஸ்வாச பொங்கல் படு வெரைட்டியாக இருந்திருக்கும் . ஸ்டில் 
அல்டிமேட் அஜித்தால் விஸ்வாசம் இஸ் வித்ஸ்டாண்டிங் ... 

ரேட்டிங்  : 2.75 * / 5

ஸ்கோர் கார்ட் : 42 


30 September 2018

செக்க சிவந்த வானம் - CCV - விசுவல் ட்ரீட் ...


ரிவியூ விற்கு போவதற்கு முன்னால்  ஒன்றை சொல்லியே ஆக  வேண்டும் . பல ஹீரோக்களை சேர்த்து வைத்து படம் எடுக்கும் போது ( குறிப்பாக சிம்பு ) புது இயக்குனருக்கே நெஞ்சு வலி வரும் . ஆனால் 62 வயதில்  இரண்டு முறை ஹார்ட் அட்டாக்கில் பாதிக்கப்பட்டு மீண்டு வந்து இத்தனை ஸ்டார் ஸை வைத்து அதுவும் ஈக்குவல் ஸ்பேஷ் கொடுத்து ஸ்க்ரீன்பிளே வை பாதிக்காமல் படமெடுப்பது என்பதெல்லாம் மணிரத்னம் மாதிரி ஆள்களுக்கு மட்டும் தான் சாத்தியம் ...

செக்க சிவந்த வானம் ( CCV ) படத்தின் தலைப்பை போலவே ரத்த சிவப்பான கேங்ஸ்டர் கதை . சேனாதிபதி ( பிரகாஸ்ராஜ் ) மறைவுக்கு பிறகு அவர் இடத்துக்கு யார் வருவது என்று மூன்று மகன்களுக்கும் ( அரவிந்த்சாமி, அருண்விஜய் , STR ) இடையே குடும்ப நண்பன் ரசூல் ( விஜய்சேதுபதி) உதவியுடன் நடக்கும் அதிகார போட்டியே  CSV . இது 2013 கொரியன் மூவி நியூ வேர்ல்ட் இல் இருந்து சுட்டது என்கிறார்கள் , நான் அந்த படம் பார்த்ததில்லை . ஆனால் மஹாபாரதம் , பொன்னியின் செல்வன் படித்திருக்கிறேன் ...

சினிமாவுக்கு வந்து 26 வருடங்கள் கடந்த பிறகும் அரவிந்தசாமி மெயின்டென் செய்யும் ஃபிட்னெஸ் பிரமிக்க வைக்கிறது . இவருக்கான பிரத்யேக ஃபைட் ஸீன் படத்துக்கு ஹைலைட் . மூத்தவனாக அப்பாவின் இடத்திற்கு வர நினைக்கும் இவரது ஏக்கம் புரிகிறது ஆனால்  அதற்காக செய்யும் கொலைகள் அதிர்கிறது . துபாய் ஷேக்குகளுடன் பிசினெஸ் ( என்ன எழவு பிசினெஸ்  வெளங்கல ) செய்யும் இரண்டாவது மகன் அருண்விஜய் . தாவி வந்து அப்பாவின் சேரில் உட்காரும் ஒரு ஸீன் இவரது கேரக்டருக்கு ஒரு சோறு பதம் . கடைக்குட்டி STR மூவரில் அதிகம் கவர்கிறார் , அப்லாஸ் அள்ளுகிறார் .


மூன்று பேரையும் போலீசாக வரும் விஜய் சேதுபதி தூக்கி சாப்பிட்டு விடுகிறார் . தாதாவோ , போலீசோ டயலாக் டெலிவரி ஒரே மாதிரி இருந்தாலும் உடல்மொழி யில் வித்தியாசம் காட்டுகிறார் . இவரது ஓப்பனிங்க் ஸீன் அண்ட் க்ளைமேக்ஸ் இரண்டுமே படத்துக்கு பெரிய ப்ளஸ் . மணி படம் என்றாலே விசுவல் ட்ரீட் . படத்தின் பட்ஜெட் பற்றாக்குறை அதிதி , டயானா உடைகளில் நன்றாக தெரிகிறது . இதிலும் சந்தோஷ் சிவன் கேமரா கழுகு போல சுத்தி நம்மை சொக்க வைக்கிறது . ஏ.ஆர்.ஆர். பாடல்களை தனியாக ஒலிக்க விடாமல் படத்தோடு சேர்த்து ஆர்.ஆர். ஆக பயன்படுத்தியிருப்பது புத்திசாலித்தனம் ...

நேரத்தை  வீணடிக்காமல் பிரகாஸ்ராஜை கொல்லப்போகும் முதல் சீனிலேயே கதையை துவக்கி விடுகிறார் மணி . அடுத்து மூன்று மகன்களையும் , நண்பன் ரூசலையும் அவர்கள் தோரணையுடன் உடனே அறிமுகப்படுத்தி விடுகிறார் . இடைவேளை வரை யார் பிரகாஸ்ராஜை கொல்ல ஆள் அனுப்பினார்கள் என்கிற சஸ்பென்ஸை மெயின்டென் செய்திருக்கிறார்கள்  . மூன்று மணி நேரம் இழுக்காமல் இரண்டரை மணிக்குள் படத்தை முடித்தது நலம் . ஆனால் டீட்டைலிங் இல்லாமல் படம் ஜம்ப் ஆவது போன்ற உணர்வை தவிர்க்க முடியவில்லை ...


சகோக்கள் கொஞ்சம் கூட குற்ற உணர்வே இல்லாமல் மோதிக்கொள்வது நெருடுகிறது . அப்பா எல்லோரையும் சுயநலமாக அவரைப்போலவே வளர்த்து விட்டார் என்று சின்ன டயலாக்குகளால் அதை சமன் கட்ட நினைப்பது சறுக்கல் . மணி படம் என்றாலே செயற்கையாக சிலர் பேசுவார்கள் . இதில் வாலே , போலெ என்று தியாகராஜன் பேசுவது , சபரிமலைக்கே பெண்கள் போகலாம் என்று தீர்ப்பு வந்துவிட்ட நிலையில் புருஷன்  கீப் வைத்திருந்தும் ஜோதிகா உருகுவது இதெல்லாம் ஓட்டவேயில்லை . எல்லா அடியாட்களையும் அருண்விஜய் ஒரே டயலாக்கில் தன்  பக்கம் இழுப்பது , ஹைடெக் துபாய் அபார்ட்மெண்டில் யாரோ வந்து போதை மருந்தை வைப்பதெல்லாம் பூ சுத்தல் ...

காட்ஃ பாதர் நினைவுக்கு வந்தாலும் கடல் , காற்று வெளியிடை சறுக்கலுக்கு பிறகு ஓரளவு நிறைவான படம் கொடுத்த இயக்குனருக்காகவும் , தனி ட்ராக் வைக்கலாமல் எல்லா கேரக்டர்களையும் சரியான விகிதத்தில் கலந்து கொடுத்த திரைக்கதை யுக்திக்காகவும் , எத்தனை ஹீரோக்கள் இருந்தாலும் இது மணிரத்னம் படம் என நிரூபித்ததற்காகவும் . நடிகர்களின் பங்களிப்பு , டெக்கனிகள் ஆஸ்பெக்ட்ஸ் க்காகவும் செக்க சிவந்த வானத்தை ஒரு முறை அண்ணாந்து பார்க்கலாம் ...

ரேட்டிங்க் : 3.25 * / 5 * 

ஸ்கோர் கார்ட் : 43 



Related Posts Plugin for WordPress, Blogger...