நடுவுல கொஞ்சம் பக்கத்த காணோம் - நிறைவு...

வித்தியாசமான தலைப்பு , வசீகரமான ப்ரொமோ இவற்றோடு மட்டும் நின்று விடாமல் தன் முதல் படத்தையே தமிழ் சினிமாக்களின் பார்முலாக்களை உடைக்கும் படமாக தந்திருக்கிறார்  இயக்குனர் பாலாஜி தரணீதரன் . லோ பட்ஜெட்டாக இருந்தாலும் படம் ஹை இம்பாக்ட் கொடுக்கிறது ...

இரண்டு நாளில்  காதலித்த பெண்ணுடன் கல்யாணத்தை வைத்துக்கொண்டு நண்பர்களுடன் கிரிக்கெட் விளையாடும் பிரேமிற்கு ( விஜய் சேதுபதி ) பின்னந்தலையில் , அதிலும் குறிப்பாக மெடுலா வில் அடிபட்டு விடுவதால் தற்காலிக நினைவுகளை இழந்து தனலட்சுமி ( காயத்ரி ) யின் காதல் உட்பட கடந்த ஒரு வருடங்களில் நடந்த எல்லாவற்றையும் மறந்து விடுகிறார் . பிரேமின் நண்பர்கள் பக்ஸ் ( பகவதி பெருமாள் ) , சரஸ் ( விக்னேஸ்வரன் ) , பஜ்ஜி ( ராஜ்குமார் ) மூவரும் நடந்த சம்பவத்தை மறைத்து பிரேமிற்கு எப்படி திருமணத்தை முடித்து வைக்கிறார்கள் என்பதை நீளமாக இருந்தாலும் நிறைவாக சொல்லியிருக்கிறார்கள் ...

இந்த வருடம் பீட்சா வை தொடர்ந்து விஜய் சேதுபதி  புகுந்து  விளையாடியிருக்கும் மற்றொரு படம் இது . பக்கத்து வீட்டு பையன் போல  பாந்தமாக  இருந்தாலும் மனிதர் வாய்ப்பு கிடைக்கும் போதெல்லாம் சின்ன சின்ன முகபாவங்களில் சிக்ஸர் அடிக்கிறார் . " என்ன ஆச்சு , கிரிக்கெட் விளையாண்டோம் " , " நீ சொன்னா பில்டிங்லருந்து குதிப்பேண்டா " என்று சொன்ன வசனங்களையே படம் நெடுக திரும்ப திரும்ப சொன்னாலும் நம்மை முடிந்தவரை சோர்வடையாமல் வைத்ததற்காகவே இவரை எவ்வளவு வேண்டுமானாலும் பாராட்டலாம் ...

லீடிங் கேரக்டரை விஜய் சேதுபதி செய்தாலும் நண்பர்களாக நடித்திருக்கும் மற்ற மூவரும் உண்மையான ஹீரோக்களே . இவர்களுள் ஸ்கேன் , கெமிக்கல் ரியாக்ஷன் பற்றியெல்லாம் சீரியசான முகத்துடன் பேசி நம்மை சிரிக்க வைக்கும் பக்ஸ் முதலிடம் வகிக்கிறார் . இவரை போன்ற ஒருவரை நம் வாழ்நாளில் நிச்சயம் சந்தித்திருப்போம் அல்லது சந்தித்துக்கொண்டிருப்போம் என்பதே இந்த கேரக்டரின் பெரிய ப்ளஸ் . மற்ற இருவரும் மிக யதார்த்தமாக நடித்திருந்தாலும் ராஜ்குமாரின் முகபாவங்களில் மட்டும் சில இடங்களில் செயற்கைத்தனம் தெரிகிறது . படம் போகிற போக்கில் இந்த குறை பெரிதாக தெரியவில்லை .

இடைவேளைக்கு பிறகு இன்ட்ரோ ஆகியிருந்தாலும் காயத்ரி நம்மை கவர தவறவில்லை . குறிப்பாக ரிசப்ஷன் காட்சிகளில் இவர் நடிப்பு அருமை . பிரேமின் தந்தை , ஒன்று விட்ட அண்ணனாக  நடித்திருப்பவர்கள் , சலூன் கடை பையன் , டாக்டர் , மதன் சார் ( படத்தில் ) இப்படி துணை கதாபாத்திரங்கள் எல்லோருமே இயல்பாக நடித்து அசத்துகிறார்கள் ...

படத்தில் நால்வரின் அறிமுக பாடல் , ப்ரோமோ பாடல் என மொத்தம் இரண்டே பாடல்கள் தான் என்றாலும் இசையமைப்பாளர் வேத்சங்கர் கவனிக்க வைக்கிறார் . சித்தார்த்தின் முதல் பாதி பின்னணி இசை ஏதோ திகில் படம் போல இருந்து வெறுப்பேற்றினாலும்  பின் பாதி ஓகே . படத்தின் ஒளிப்பதிவாளர் பிரேம்குமாரின் வாழ்க்கையில் உணமையிலேயே நடந்த சம்பவன் தான் கதையின் கரு . அந்த ஒன்லைனை இவ்வளவு அழகாக , இயல்பாக சொன்ன விதம் உண்மையிலேயே பிரமிக்க வைக்கிறது ...

சீரியசாக படத்தில் நடக்கும் விஷயங்கள் நம்மை விடாமல் சிரிக்க வைப்பதே படத்தின் ஹைலைட் . குறிப்பாக மதன் சார் ஒரு பெண்ணை பற்றி சொல்லிவிட்டு நடந்து போகும் போது கூட வந்தவர் அந்த பெண்ணின் பெர்சனாலிட்டியை பற்றி விசாரிப்பது வாய்ஸ் ஓவரில் கேட்பது , பக்ஸ் தனத்தை சமாளிக்க செல்போனில் தனியாக பேசுவது என்று நிறைய சீன்களை சொல்லிக்கொண்டே போகலாம் ...

படத்தின் நீளம் , சில இடங்களில் நெளிய வைக்கும் ரிப்பீட்டட் வசனங்கள்  , மிதமிஞ்சிய யதார்த்த சூழல் , ஒரு வருடத்தில் நடந்ததை மறப்பவன் எப்படி பத்து வருடங்களுக்கு முன் இறந்த சிவாஜியையும் , ஐந்து வருடங்களுக்கு முன் வந்த சிவாஜி படத்தையும் மறக்க முடியும்  , ஏன் வேறெந்த நரம்பியல் நிபுணரையும் நண்பர்கள் அணுகவில்லை என்பது போன்ற கேள்விகள் உட்பட சில குறைகள் படத்தில் நிறைய பக்கத்த காணோமோ என்கிற நினைப்பை ஏற்ப்படுத்தினாலும் ஏதோ நமக்கு தெரிந்த நாலு நண்பர்களை பார்த்து விட்டு வந்த உணர்வை அழுத்தமாக  பதிவு செய்த விதத்தில் படம் கொஞ்சமல்ல நிறைவாகவே  மனதில் பதிகிறது ...

ஸ்கோர் கார்ட் : 45

லைஃப் ஆஃப் பை - LIFE OF PI ...

ஆஸ்கார் விருது வாங்கிய இயக்குனர் ஆங் லீ யின் அற்புதமான படைப்பு லைஃப் ஆஃப் பை . பாண்டிச்சேரியில் தொடங்கும் படம் பசிபிக் பெருங்கடலில் சுனாமி போல பார்ப்பவர்களையும் இழுத்துக்கொண்டு செல்கிறது ...

பிஸ்சிங் படேல் ( எ ) பை ( இர்பான் கான் )கப்பல் விபத்தில் தன்  குடும்பத்தை இழந்ததையும் , லைஃப் ; போட்டில் தப்பித்துப் போகும் போது ஒரு வங்காளப் புலியிடம் சிக்கிக்கொண்டு  பல மாதங்கள் தனியாக நடுக்கடலில் போராடியதையும் தன் நண்பனிடம் விளக்குகிறான் . நாவலில் இருந்து தழுவப்பட்ட இந்த கதையை தத்ரூபமாக எடுத்து புலி மற்றும் பை யுடன் சேர்த்து நம்மையும் கடலில் பிரயாணப்பட வைத்ததே படத்தின் வெற்றி...

இர்பான் கான் பை கதாபாத்திரத்தில் இயல்பாக பொருந்துகிறார் . ஸ்லம் டாக் மில்லினியரை தொடர்ந்து தனக்கு கிடைத்த வாய்ப்பை சரியாக பயன்படுத்திக் கொண்டிருக்கிறார் . பை யின் தாயாக தபுவும் , தந்தையாக நடித்திருப்பவரும் சரியான தேர்வு . இளம் வயது பை யாக நடித்திருக்கும் சூரஜ் ஷர்மா பயம் , கோபம் , பரிவு , காதல் என எல்லா உணர்ச்சிகளையும் சிறப்பாக வெளிப்படுத்துகிறார் . முதலில் புலிக்கு பயந்தாலும் போக போக புலியோடு சேர்த்து நம்மையும் தன் நடிப்பால் அரவணைக்கிறார் ...

   
படத்தின் மற்றொரு முக்கியமான கேரக்டர் ரிச்சர்ட் பார்க்கர் என்று அழைக்கப்படும் வங்காள புலி . அழிந்து வரும் அரிதான இனங்களில் ஒன்றாகி விட்ட வங்காள புலி பை யை பிரியும் போது நமக்கும் ஏதோ நெருடுகிறது ... படத்தின் ஒளிப்பதிவு , இசை , எடிட்டிங் , கிராபிக்ஸ் எல்லாமே உலகத்தரத்திற்கு ஒரு படி மேலே நிற்கின்றன . பாண்டிச்சேரியை இவ்வளவு அழகாக வேறு எவரும் காட்டியிருக்க  முடியாது . டால்பின் , மங்கூஸ் என படத்தில் கிராபிக்ஸ் கலக்கல்கள் ஏராளம் . அட்வென்ட்சருடன் சேர்த்து கடவுளை பற்றிய கேள்விகளையும் ஆங்காங்கே தெளித்திருப்ப்து இயக்குனரின் புத்திசாலித்தனம் ...

பாண்டிச்சேரி பின்னணி , சில நிமிடங்களே வந்தாலும் கவனிக்க வைக்கும் பை - ஆனந்தி ( ஷ்ரவந்தி ) காதல் காட்சிகள் , புலியின் குணத்தை மகனுக்கு தந்தை புரிய வைக்கும் காட்சி , கழுதை புலி , குரங்கு , வரிக்குதிரை இவற்றுக்கிடையே நடக்கும் கூத்து , புலியையும் , அதே சமயம் அதனிடமிருந்து தன்னையும் காத்துக்கொள்ளும் பையின் போராட்டம் என படத்தின் நிறைய விஷயங்கள் பிரமிக்க வைக்கின்றன ...

       
நீண்ட நாள் பட்டினியால் புலி , பை இருவரின் உடல்களையும் இஅலைக்க வைத்ததில் காட்டப்பட்ட லாஜிக் நேர்த்தி கடல் விபத்து சம்பந்தப்பட்ட காட்சிகளிலும் காட்டப்பட்டிருக்கலாம் . அந்த காட்சிகளில் ஏதோ அவசரம்
தெரிகிறது . கிராபிக்ஸ் , அட்வென்ட்சர் , பிரமாண்டம் என எல்லாமே ஆங்கிலப் படங்களுக்குரியவையாக இருந்தாலும் இந்திய பின்னணியும் , இரண்டு வெவேறு உயிரினங்களுகிடையேயான நேசம் , பிரிவு , வேறுபாடுகள் இவற்றை அழமாக பதிவு செய்த விதத்திலும் லைஃப் ஆஃப் ஒரு லைஃப் டைம் மூவியாக நம் மனதில் நெருக்கமாக பதிகிறது . நல்ல திரையரங்கில் , 3 டியில் குடும்பத்தோடு கட்டாயம் பார்க்க வேண்டிய படம் ...

அஜ்மல் கசாப் கதம் கதம் ...

26/11/2008 ஆம் ஆண்டு மும்பையில்  நடந்த அதி பயங்கர தீவிரவாத தாக்குதலை யாரும் மறந்திருக்க முடியாது . பல இந்தியர்களின் உயிரை குடித்த அந்த சம்பவத்திற்கு காரணமானவர்களில் ஒருவனான  அஜ்மல் கசாப் அதே நவம்பர் மாதமான இன்று காலை 7.30 மணியளவில் புனே சிறைச்சாலையில் தூக்கிலிடப்பட்டான் ...

நம் நாட்டிற்க்கு எதிராக தீவிரவாதம் செய்த அயல் நாட்டவனின் தூக்கு தண்டனையை நிறைவேற்றுவதற்கு நான்கு  வருடங்கள் பிடித்திருக்கின்றன . அவன் பாதுகாப்பிற்காக செலவிடப்பட்ட பல கோடிகள் இனி அரசாங்கத்திற்கு மிச்சம் . கசாப்பின் தூக்கு தண்டனைக்கு எதிரான  கருணை மனுவை ஜனாதிபதி பிரணாப் முகர்ஜி நிராகரித்ததை தொடர்ந்து தண்டனையை சத்தமில்லாமல் நிறைவேற்றியிருக்கிறது அரசு . அரசாங்கம் செய்த துணிச்சலான , மிக உருப்படியான காரியங்களுள் இது ஒன்று என அடித்து சொல்லலாம் ...

தனிப்பட்ட முறையில் மரண தண்டனைக்கு எதிரான கருத்துடையவர்கள் கூட  இது போன்ற தீவிரவாதிகளுக்கு எதிராக கொடுக்கப்படும் மரண தண்டனையை நிச்சயம் ஆதரிப்பார்கள் என்று நம்புகிறேன் . இந்த மரண தண்டனையால் இறந்தவர்கள் திரும்ப உயிருடன் வந்து விடுவார்களா என்றோ தீவிரவாதத்தை முற்றிலும்  ஒழித்து விட முடியுமா என்றோ கேள்வி கேட்கும் அறிவாளிகள் கேட்டுக் கொண்டே இருக்கட்டும் . போன உயிர் திரும்ப வராது தான் , ஆனால் இனிமேலும் உயிர்கள் போகாமல் தடுக்கலாம் . தீவிரவாதத்தை ஒழிக்கும் நடவடிக்கைகளில் இது முடிவல்ல ஆரம்பமே ...

2001 ஆம் ஆண்டு நடந்த தீவிரவாத தாக்குதலுக்கு பிறகு அமெரிக்கா எடுத்து வரும் கடுமையான நடவடிக்கைகளால் தான் அங்கு அதன் பிறகு எந்த விதமான அசம்பாவிதங்களும் ஏற்படவில்லை என்பதை அனைவரும் புரிந்து கொள்ளவேண்டும் . நாட்டின் இறையாண்மைக்கு எதிரான எந்தவொரு குற்றத்தையும் சாதாரணமாக எடுத்துக்கொள்வதோ  அல்லது  அதில் சம்பந்தப்பட்டவர்களை ஜாதி , இன , மதங்களோடு ஒப்பிட்டுப்பார்ப்பதோ மறைமுகமாக தீவிரவாதத்தை வளர்ப்பதற்கு சமம் ...

அஜ்மல் கசாப் ஒருவனை தூக்கில் போட்டதோடு நின்று விடாமல் அப்சல் குரு உட்பட இது போன்ற தீவிரவாதிகளுக்கு எதிராக வழங்கப்பட்ட தண்டனைகளை நிறைவேற்றி   , நாட்டின் பாதுகாப்பை பலப்படுத்தி தீவிரவாத சம்பவங்கள் நடக்காமல் தடுத்து மக்களை காப்பதிலும் அரசாங்கம் தன் கடமையை செவ்வென செய்யும் என அனைவரும் நம்புவோம் ...

போடா போடி - பொழுதுபோக்கு ...

நீண்ட நாட்கள் கிடப்பில் இருந்து விட்டு தீபாவளிக்கு வந்திருந்தாலும் விடிவி க்கு பிறகு விரல்வித்தைகள் காட்டாத சிம்புவை ரசிக்க வைத்திருக்கும் படம் போடா போடி . சிம்பு - வரலக்ஷ்மி ஜோடி படத்தின் பல குறைகளை மறக்கடிக்க  வைத்திருப்பது உண்மை . பெரிதாக எதையும் யோசிக்காமல் வெவ்வேறு மனநிலைகள் கொண்ட இருவரின் வாழ்க்கையை மட்டும் பொழுதுபோக்காக மெச்சூரிட்டியுடன் பதிவு செய்திருக்கிறார் புதுமுக இயக்குனர் விக்னேஷ் சிவன் ...

லண்டனில் வசித்தாலும் கலாச்சார ரீதியாக அந்த வாழ்க்கையோடு ஒத்துப்போகாத அர்ஜுன் ( சிம்பு ), அதே கலாச்சாரத்தில் ஊறிப்போன நிஷா
( வரலக்ஷ்மி ) இருவரும் காதலித்து திருமணம் செய்து கொள்கிறார்கள் , பின்பு ஒத்துவராமல் பிரிகிறார்கள் , கடைசியில் புரிந்து கொண்டு சேர்கிறார்கள் . இந்த ஒன் லைனை கொஞ்சம் ஓவர் டோஸாக இருந்தாலும் சுவைபட சொல்லியிருக்கிறார் இயக்குனர் ...

சிம்புவிற்கு இது அல்டிமேட் கேரக்டர் . படம் முழுவதும் வரலக்ஷ்மியையும் வைத்துக் கொண்டு புகுந்து விளையாடியிருக்கிறார் . ஆட்டம் , பாட்டத்தோடு சேர்த்து குழந்தை மேலிருக்கும் அன்பை சொல்லி அழும் இடத்தில் தனக்கு நன்றாக நடிக்கவும் வரும் என்று நிரூபிக்கிறார் . தன் பழைய படங்களை  மேற்கோள் காட்டி சிம்பு பேசுவதை தவிர்த்திருந்தால் அவருடைய கேரக்டர் இன்னும் யதார்த்தமாக மனதில் பதிந்திருக்கும் ...

வரலட்சுமிக்கு இது முதல் படம் போல தெரியவில்லை , அந்த அளவிற்கு தன் மொத்த திறமையையும் காட்டி ( நடிப்ப மட்டும் தாங்க சொன்னேன் ! ) நடித்திருக்கிறார் . தயாரிப்பாளரின் பணப்பற்றாக்குறை வரு அணிந்திருக்கும் உடைகளில் நன்றாகவே தெரிகிறது.  அம்மணி முக்கால்வாசி படத்தில் வெறும் குட்டி  டவுசருடன் தான் வருகிறார் . படம் பல வருடங்கள் தயாரிப்பில் இருந்ததும் வருவின் உடல் எடையில் கூடுதலாகவே தெரிகிறது...

சிம்பு - கணேஷ் காம்பினேஷன் இந்த படத்திலும் நன்றாகவே வேலை செய்திருக்கிறது . கணேஷ் பேசும் போதெல்லாம் கைதட்டுகிறார்கள் ... ஷோபனாவிற்கு கண்ணை உருட்டுவதை தவிர பெரிதாய் வேலையில்லை . இவர் கேரக்டரில் பெரிய அழுத்தமுமில்லை ... தரன் இசையில் " லவ் பண்லாம " , " அப்பன்மவனே " பாடல்கள் அருமை . ஆனால் அடிக்கொரு தடவை பாட்டை போடுவதை தவிர்த்திருக்கலாம் .

லண்டனில் வளர்ந்த பெண்ணை கல்யாணம் செய்துவிட்டு தமிழ்ப்பொண்ணு இப்படித்தான் இருக்கணும்  என்றெல்லாம் ஓவர் வசனம் பேசும் இடத்தில் சிம்பு கேரக்டர், மனதில் ஒட்டாத வருவின் சல்சா நடனம் மற்றும் அந்த போட்டியில் ஜெயிப்பதற்காக இருவரும் எடுக்கும் முயற்சி , ரசிக்க வைத்தாலும் அளவுக்கு மீறிய  அடல்ஸ் ஒன்லி மேட்டர்ஸ்  , அனைத்து தரப்பினரையும் கவராமல் போகும் கதைக்களம் போன்ற குறைகள் படத்தில் இருந்தாலும் திருமணம் பற்றிய அட்வைஸ் எல்லாம் செய்யாமல் இருவரை மட்டுமே பிரதானமாக வைத்துக்கொண்டு ஒரு லவ் ஸ்டோரியை லைவாக போரடிக்காமல் சொன்ன விதத்திற்காகவே படத்தை பார்க்கலாம் .

எதைப்பற்றியும் சிந்திக்காமல் ரிலாக்ஸாக பார்த்தால் போகிற போக்கில் தெளிக்கப்படும் கா(ம)மெடிகளை நிறையவே ரசிக்கலாம் . படத்தை கால தாமதம் இல்லாமல் ரிலீஸ் செய்து , ஒஸ்திக்கு கொடுத்த ஓவர் பில்ட் அப்பில் பாதியையாவது கொடுத்து ப்ரமோ செய்திருந்தால் படம் நிச்சயம் சிம்புவின் ஹிட் லிஸ்டில் இடம் பிடித்திருக்கும் ...

ஸ்கோர் கார்ட் :  41 

துப்பாக்கி - ஏ. ஆர். 47...

தமிழகத்தில் ஆட்சி மாற்றம் ஏற்பட்ட பிறகு விஜய்க்கு நல்ல நேரம் தொடங்கிவிட்டது என்று நினைக்கிறேன் , வேலாயுதம் , நண்பன் வெற்றிகளை தொடர்ந்து  துப்பாக்கியிலும் ;சரவெடி வெடித்திருக்கிறார். வழக்கமாக விஜய் படங்களில் வரும் பஞ்ச் வசனங்கள் , குத்துப்பாட்டு , ஏய் , ஊய் என்று கத்தும் வில்லன்கள் ,  டாடா சுமோவில் வரும் அடியாட்கள் இவைகளெல்லாம் இல்லாமலேயே துப்பாக்கியை நன்றாக சுட வைத்திருக்கிறார் ஏ . ஆர் .முருகதாஸ் ...

விடுமுறைக்கு தன் குடும்பத்தை  பார்க்க மும்பைக்கு வரும் ஆர்மி மேன் ஜகதீஷ் ( விஜய் ) அங்கு தொடர் குண்டுவெடிப்பு நடக்கவிருப்பதை அறிகிறார் . தன் விடுமுறை முடிவதற்குள் குண்டுவெடிப்புகளையும் , அதற்கு காரணமானவனையும் எப்படி அழிக்கிறார் என்பதே கதை . ஆக்சனுக்கு நடுவில் அவ்வப்போது விஜய் ரிலாக்ஸ் செய்வதற்காக நிஷாவை ( காஜல் அகர்வால் ) லவ்வுகிறார் கம் கவ்வுகிறார் ...

ஆக்சன படத்தில் விஜய் அடக்கி வாசித்திருப்பது தான் புதுசே ஒழிய குறுந்தாடி தவிர கெட்டப்பில் விஜய்க்கு நோ சேன்ச். படம் முழுவதும் விஜய் துறுதுறுப்பாக இருப்பது பெரிய ப்ளஷ் . படத்தின் ஆரம்பத்திலும் , முடிவிலும் மட்டுமே  ராணுவ உடையில் வந்து விஜய் நம்மை பெருமூச்சு விடவைத்திருப்பது மிகப்பெரிய  ப்ளஷ் . மனிதர் ஆட்டம் , பாட்டத்தோடு ஹிந்தி , ஆங்கிலம் என்று மற்ற மொழிகளிலும் பேசி புகுந்து விளையாடியிருக்கிறார் .

விஜயுடன் சேர்த்து ரசிகர்களையும் ரிலாக்ஸ் ! செய்வதாய் நினைத்து கடுப்பேற்றுகிறார் மணிபர்ஸ் உதட்டழகி காஜல் அகர்வால் . கலகலவென்று அறிமுகம் ஆகும் காஜல் கேரக்டர் அதை தக்கவைத்துக் கொள்ளாமல் போனது  அவர் குற்றமல்ல . படத்திற்கு ஸ்பீட்  பிரேக்கர் போல இவர் வந்து போவது பெரிய குறை ...நண்பனில் கலக்கிய சத்யனுக்கு இந்த படத்தில் பெரிய ஸ்கோப் இல்லையென்றாலும் தன் பங்கை நிறைவாக செய்திருக்கிறார் . பில்லா 2 வில் அஜித்திடம் அடி வாங்கிய வில்லன் வித்யுத் இதில் விஜயிடம் அடி வாங்குகிறார் அவ்வளவே . ஜெயராம் கொஞ்சம் அறுத்தாலும் கிச்சு கிச்சு மூட்டுகிறார் ...

சந்தோஷ் சிவனின் ஒளிப்பதிவு கண்களுக்கு குளுமை . எடிட்டர் ஸ்ரீகர்பிரசாத் படத்தின் நீளத்தை குறைத்திருக்கலாம் , இயக்குனரின் விருப்பப்படி விட்டுவிட்டார் போல . ஹாரிஸ் " அண்டார்டிகா " , " கூகிள் " போன்ற தன் டெம்ப்ளேட் பாடல்களால் தாளம் போட வைக்கிறார் . மற்ற பாடல்கள் படத்தில் வலுக்கட்டாயமாக திணிக்கப்பட்டது போல சலிப்பை தருகின்றன .  பின்னணி இசைக்காக கொஞ்சம் முயற்சி செய்திருக்கிறார் என்று சொல்லலாம் ...

சாதாரணமான கதைக்கருவை சுவாரசியமாக்கும் திரைக்கதை , ரமணா , ஏழாம் அறிவு போல நீள , நீளமாக இல்லாமல் தேசப்பற்றை சுருக்கென்று ஏற்றும் பளிச் வசனங்கள் ,  எதிர்பாரா  நேரத்தில் வைக்கப்படும் ட்விஸ்ட் , அடுத்து என்ன நடக்கும் என்பதை எதிர்பார்க்க வைக்கும் காட்சிகள் போன்றவை துப்பாக்கியை தூள்பாக்கி என்று சொல்ல வைக்கின்றன .

செல்போன் டவரை வைத்தே விஜய் எங்கிருக்கிறார் என்பதை எளிதாக கண்டுபிடித்து விடலாம் எனும்போது அதை விட்டுவிட்டு வில்லன் விஜயை தேடி அலைவது  திரைக்கதைக்கு உதவியிருந்தாலும் லாஜிக்கை பொறுத்தவரை பெரிய சொதப்பல் . படத்தின் நீளம் , விஜய் - காஜல் காதல் காட்சிகள் , " நம்ம பயலுக அமெரிக்காவே போனாலும் அண்ட்ராயர் தான் போடுவாங்க்ய " என்பது போல விஜய் - வித்யுத் இருவருக்குமிடையே நடக்கும் ஒண்டிக்கு ஒண்டி க்ளைமாக்ஸ் சண்டைக்காட்சி (  அதிலும் சண்டை  என்ற பெயரில் விஜய் டான்ஸ் ஸ்டெப்ஸ் போடுவதெல்லாம் ஓவர் ) போன்ற குறைகள் துப்பாக்கியை தப்பாக்குகின்றன .

" ஒன் மேன் ஆர்மி " யாக விஜய் சுற்றி வந்தாலும் அவரை அன்டர்ப்ளே செய்யவிட்டு அனைவரையும் ரசிக்க வைத்த விதத்திலும் ,  மாஸ் ஹீரோவாக  இருந்தாலும் இயக்குனரிடம் தன்னை முழுமையாக ஒப்படைத்தால் தன் ரசிகர்கள் வட்டத்தையும் தாண்டி ஹீரோக்கள் ரீச் ஆக முடியும் என்பதை நிரூபித்த விதத்திலும் ஏ . ஆர் . முருகதாஸ் இயக்கிய துப்பாக்கி - ஏ .ஆர் . 47...

ஸ்கோர் கார்ட் : 43 

ஓர் புன்னகை ...!

ஆணாய் பிறந்து

அழகாய் வளர்ந்து 

அன்பில் திளைத்து
அறிவை பெற்று 

சேட்டைகள் செய்து 

முதல் காதல் பெற்று 

பொருள் தேடி 

தினம் உழன்று
வாயைக் கட்டி
வயிற்றைக் கட்டி
வீட்டைக் கட்டி
விருப்பமான மனைவியுடன்
அதில் குடி புகுந்து
மனைவியின் முறைப்பையும்
பொருட்படுத்தாமல்
கிறுக்கல்களை வலைத்தளத்தில்
பதிவாய் பதித்து
அதற்கும் வரும்
பின்னூட்டங்களால்
பரவசம் அடைந்து
சுலப தவணைகளில்
வேண்டியதை பெற்று
சினிமாவை சிலாகித்து
சண்டைகள் போட்டு
சறுக்கி விழுந்து
மீண்டும் எழுந்து
பரிசுகள் குவித்து
பாராட்டில் நனைந்து
நித்தம் வாழ்க்கையில்
கிடைக்கும்
நிம்மதிகள் எல்லாம்
மகளே
கன்னக்குழி விழ 
நீ பூக்கும்
ஓர் புன்னகைக்கு
ஈடாகுமா ?!

பீட்சா - சாப்பிடலாம் ...

திகில் படங்கள் எனக்கு பிடிக்கும் , அதிலும் பீட்சா பட இயக்குனர் கார்த்திக் சுப்பராஜ் இயக்கியிருந்த " ப்ளாக் & வைட் " என்னை கவர்ந்த க்யூட் குறும்படம் என்பதால் பீட்சாவிற்கு எந்த வித தயக்கமும் இல்லாமல் சென்றேன் . படம் பார்ப்பவர்கள் நிச்சயம் பீட்சாவில் எதிர்பாராததை எதிர்பார்க்கலாம் ...

பீட்சா டெலிவரி செய்யும் மைக்கேல் ( விஜய் சேதுபதி ) தன் லவ்வர் அனு
( ரம்யா நம்பீசன் ) வுடன் " போத்திக்கிட்டு படுத்தா என்ன படுத்துக்கிட்டு போத்தினா என்ன " என்கிற நினைப்பில் திருமணம் செய்து கொள்ளாமலேயே லிவிங் டுகெதர் பாணியில் வசித்து வருகிறார் . பேய் , பூதம் , அமானுஷ்யங்களில் நம்பிக்கையுள்ள அனு மைக்கேலிடம் ஒரு நாள் அவற்றை நேரில் சந்திக்கும் தருணம் உனக்கும் வரும் என்கிறார் . அனு சொன்னது போல அந்த ஒரு நாளும் வருகிறது , அதன் பிறகு என்ன ஆனது என்பதை சுவாரசியமாக சொல்லியிருக்கிறார்கள் ...

விஜய் சேதுபதிக்கு இந்த படம் ஒரு மைல்கல் . மனிதர் பங்களாவிற்குள் தனியாளாக இருந்து கொண்டு பயப்படும் காட்சிகளில் மிரட்டியிருக்கிறார் .  காதல் காட்சிகளிலும் இவரது நடிப்பு யதார்த்தமாக இருக்கிறது . குள்ளநரி கூட்டத்திற்கு பிறகு காணாமல் போய் விட்டாரே என்று நான் வருத்தப்பட்ட ரம்யா நம்பீசன் சிறிய இடைவெளிக்கு பிறகு பீட்சாவில் நடித்திருக்கிறார் . அம்மணியின் உடம்பு அவரது கேரக்டர் போலவே கொஞ்சம் அப் நார்மலாக இருந்தாலும் ரசிக்க வைக்கிறார் ...

இரண்டு லீட் கேரக்டர்களை தவிர படத்தில் வரும் பிட்சா சாப் ஓனர் சண்முகமாக வரும் நரேன் , இரண்டு பிட்சா கடை ஊழியர்கள் , பேய் பங்களாவில் வரும் கணவன் - மனைவி என்று சின்ன சின்ன ரோல்களில் வருபவர்கள் கூட நம்மை கவர்கிறார்கள் , அதிலும் பேய்  பங்களாவில் குளியல் உடையுடன் முடியை துவட்டிக்கொண்டே வரும் பூஜா " பீட்சாவே ஆறிடும் " என்று விஜய் சேதுபதியிடம் சொல்லும் போது நம்மை சூடேற்றுகிறார் ...

படத்தின் ஒளிப்பதிவு உலகத்தரம் . லொக்கேசன்களை மாற்றாமல் நம்மை படத்தோடு ஒன்ற செய்வதற்கு , நடிப்பும்  திரைக்கதையும் போதாது , ஒளிப்பதிவும் மிக மிக அவசியம் என்பதை உணர்ந்து செய்திருக்கிறார் கோபி அமர்நாத் . ரொமாண்டிக் சாங்கில் இசை , ஒளிப்பதிவு , படம் பிடித்த விதம் எல்லாமே அருமை . திகில் படம் என்பதற்காக வெறும் இரைச்சலை இசையாக கொடுக்காமல் தரமாக பின்னணி இசையை தந்திருக்கிறார்  சந்தோஷ் நாராயண் . சில காட்சிகளில் இவர் இன்னும் நன்றாக செய்திருக்கலாமோ என்கிற எண்ணமும் தோன்றாமல் இல்லை ...

த்ரில்லர் வகை படங்கள் எடுப்பதென்பது இரு பக்கமும் கூர்மையுள்ள ஆயுதத்தை கையாள்வது போன்றது . கொஞ்சம் பிசகினாலும் பார்ப்பவர்கள் கேலி செய்து சிரித்து விடக்கூடிய அபாயம் இருக்கிறது . பொதுவாக  நிறைய பேர் ஜாலி படத்தை பார்த்து விட்டு விழுந்து விழுந்து சிரித்தேன் என்று சொல்வதை போல பேய்  படத்தை பார்த்து பயந்து நடுங்கினேன் என்று சொல்வதற்கு விருப்பப்படுவதில்லை . தமிழ்  சினிமாவில் திகில் படங்களுக்கான ரசிகர்கள் குறைவு என்று கூட சொல்லலாம் .இது போன்ற   தடங்கல்கள் இருந்தும் தன் முதல் படத்தையே த்ரில்லர் வகை படமாக எடுத்ததற்கும் , அதில் தேவையில்லாமல்  பாடல்  , காமெடி , கிளாமர் போன்றவற்றை புகுத்தி எந்தவித காம்ப்ரமைசும் செய்து கொள்ளாமல் இரண்டு லீட் கேரக்டர்கள் மற்றும் ஒன்றிரண்டு லொக்கேசன்களை மட்டுமே வைத்துக் கொண்டு திரைக்கதையால் நம்மை கட்டிப்போட்டதற்கும்  இயக்குனரை எவ்வளவு வேண்டுமானாலும் பாராட்டலாம் ...

அனு  கர்ப்பமானவுடன் " நாம ரெண்டு பேரும் கேர்லெஸா இருந்திட்டோமோ " என்று மைக்கேல் சொல்வது , மைக்கேல் நண்பர்களிடம் அனு  கர்ப்பமான விஷயத்தை பற்றி பேசும் போது அவர்கள் " வேணுமின்னா காண்டம் கம்பனி மேல கேஸ் போட்டுரலாம் " என்று சொல்லி கிண்டல் செய்வது போன்ற இடங்களில் வசனங்கள் க்யூட் ...

விறுவிறுப்பாக ஆரம்பிக்கும் படம் பின்னர் கொஞ்ச நேரம் தொய்வாக நகர்கிறது . ரம்யா - விஜய் சம்பந்தப்பட்ட காதல் காட்சிகள் நன்றாக இருந்தாலும் யாருமில்லாத வீட்டில் இருவரும் திருமணம் செய்துகொள்வது , அவர்கள் அனாதை  ஆசிரம பின்னணி , பேய் பற்றி அவர்கள் பேசிக்கொள்வது போன்றவை பெரிதும் ரசிக்கும் படியில்லை ...

மூன்று வருடங்களாக ஒரே வீட்டில் வசித்து வரும் அனுவை ஏன் யாருமே பாத்ததில்லை ?, அப்படியே பார்த்திரா விட்டாலும் போலீசில் ஒரு போட்டோ கூடவா கேட்க மாட்டார்கள், பேய் வீட்டிலிருந்து யார் பீட்சாவிற்கு ஆர்டர் கொடுத்தார்கள் என்பதை  ஏன் முதலாளி கண்டுகொள்ளவேயில்லை , கடைசியில் அனு என்ன ஆனாள் ? போன்ற கேள்விகள் நம்மை குடைந்தாலும் இயக்குனர் நம்மை படத்தோடு என்கேஜ் செய்துவிடுவதால் நாம் அந்த ஏன்களை கொஞ்சம் எட்டப்போடலாம்...

டேஸ்டாக இருக்கும் பீட்சாவை  இன்னும் கொஞ்சம்  ஃபாஸ்டாகவும் டெலிவரி செய்திருக்கலாமோ என்று தோன்றினாலும் வரிசையாக தாண்டவம் , மாற்றான் என்று தேடிப்  போய் பார்த்து மாறி மாறி நொந்து போவதற்கு நிச்சயம் பீட்சா - சாப்பிடலாம் ...

ஸ்கோர் கார்ட் : 46

ஆதிபகவன் - அசத்தும் இசை ...

அப்பாவை போலவே தன் ஒவ்வொரு படங்களுக்கிடையேயும் வித்தியாசம் காட்ட முயல்பவர் யுவன்ஷங்கர்ராஜா , அதனால் தான் அவருக்கு
" பருத்திவீரன் " ,  " பில்லா " இரண்டுமே சாத்தியமாகிறது . ஐந்து வருடங்களுக்கு பிறகு அமீர் - யுவன் கூட்டணியில் வந்திருக்கிறான் ஆதிபகவன்... வழக்கம் போல யுவனுடன் கை கோர்க்கும் முத்துக்குமாருக்கு பதில் ஆதிபகவனில்  சினேகன் சேர்ந்திருக்கிறார் . நீண்ட நாட்களுக்கு பிறகு கவிஞர் அறிவுமதியும் ஒரு பாடல் எழுதியிருக்கிறார் . ஒரு முழு நீள ஹிந்திப்பாடல் மற்றும் தீம் சாங் உட்பட ஆறு பாடல்களுடன் அசத்தலாய் இருக்கிறது இசை ... பாடல்களின் வரிசை இதோ :

1.அகடம் பகடம்...
   மோஹித் சௌஹான்
   பாடல் : மனோஜ்

    முழு நீள  ஹிந்திப்பாடல் . கேட்டவுடனேயே தாளம் போட  வைக்கிறது. இசைக்கு மொழி தேவையில்லை என்று நிரூபித்திருக்கும் பாடல் ...

2.பகவான் ராப் சாங் ...
   சத்யன்

     ராப் ஸ்டைல் தீம் சாங் . பின்ணணி இசையுடன் வரும் பகவான் ஹம்மிங் முணுமுணுக்க வைக்கிறது ...

3.ஐசலாம் ஐசலாம் ...
   மானசி ஸ்காட் / ராகுல் நம்பியார்
   பாடல் : சினேகன்

     மானசியின் மயக்கும் குரலில் வரும் பார்ட்டி சாங் . யுவன் தனக்கு பிடித்த தளத்தில் புகுந்து விளையாடியிருக்கிறார் ...

4.காற்றிலே நடந்தேனே ...
   உதித் நாராயண் / ஸ்வேதா பண்டிட்
   பாடல் : அறிவுமதி

     தனது பாடல்களில் ஆங்கிலத்தை கலக்காத அறிவுமதியின் அழகான வரிகள் , ஆனால் அதை உதித்தை விட்டு கொலை செய்திருக்க வேண்டாம் . உதித் அடித்தொண்டையில் பாடிய மற்ற பாடல்களை போலவே இதுவும் ஹிட் ஆகும் ...

5.ஒரு துளி விஷமாய் ...
   ஷரிப் சபரி / ஸ்ரேயா கோஷல்
   பாடல் : சினேகன்

     படத்தின் மெலடி டூயட் சாங் . இசைக்காகவும் , ஸ்ரேயாவின் குரலிற்காகவும் எத்தனை முறை வேண்டுமானாலும் கேட்கலாம் ...

6.யாவும் பொய்தானா...
   மதுஸ்ரீ
   பாடல் : சினேகன்

     கஜல் ஸ்டைலில் வரும் காதல் தாப பாடல் . பில்லா 2 வில் வரும் " இதயம் " பாடலை நினைவுபடுத்தும் கம்போசிங் .  பாடலில் கவிஞர் சினேகன் தெரிகிறார் ...
     

     
 
 

மாற்றான் - மயக்கியிருப்பான் ...

சமீபத்தில் தான் சாருலதா வந்திருந்தாலும் இரண்டு வேடங்களில் சூர்யா நடித்திருப்பதும் , ஏற்கனவே இவரை வைத்து ஹிட் கொடுத்த கே.வி.ஆனந்த் படத்தை இயக்கியிருப்பதும் எதிர்பார்ப்பை எகிற வைத்திருந்தன ... இடைவேளை வரை அந்த எதிர்பார்ப்பை பூர்த்தி செய்ததால்  " மாற்றான் - ஏமாற்றான் " என்று சொல்லியிருக்க வேண்டிய படம் அதன் பிறகு ஜவ்வாக இழுத்ததால் " மாற்றான் - மயக்கியிருப்பான்  " என்று  சொல்ல வைத்துவிட்டது ...

மரபணு விஞ்ஞானி ராமச்சந்திரனின் ( சச்சின் கண்டேல்கர் ) சோதனை முயற்சியால் விமலன் - அகிலன்  ( சூர்யா ) இருவரும் ஒட்டிப்பிறந்த ரெட்டையர்களாக பிறக்கிறார்கள் , வளர்கிறார்கள் ... வெற்றிகரமாக விற்பனை ஆகிக் கொண்டிருக்கும் அப்பாவின் எனர்ஜி ஆன் பால் பவுடரில் ஏதோ தவறிருப்பதாக விமலனுக்கு தெரிய வர , அதை வெளிக்கொண்டு வரும் முயற்சியில் அவர் உயிர் துறக்கிறார் ... விமலன் விட்டதை அகிலன் தொடர்ந்து வெற்றி கண்டாரா என்பதை நீட்டி முழக்கி சில சீன்களில் ஆவ் என்று கொட்டாவி விட வைத்து சொல்லியிருக்கிறார்கள் ... 

இது போன்ற கதைகளை சூர்யாவை மனதில் வைத்தே செய்ய முடியும் என்பதே சூர்யாவின்  சக்சஸ் ... வேறு வேறு சீன்களில் டபுள் ஆக்டிங் செய்து விடலாம் , ஆனால் இடைவேளை வரை ஒன்றாக இருந்து கொண்டு இருவருக்குமிடையே வித்தியாசம் காண்பிப்பது என்பது மிகவும் கடினம் , அதை சிறப்பாக செய்திருக்கிறார் சூர்யா ... ஷாப்டான விமலனை அகிலன் கலாய்க்கும் இடங்கள் கல கல ... தியேட்டரில் காஜலுக்கு சூர்யா கிஸ் அடிக்கும் சீன்  உட்பட சில இடங்களில் சி.ஜி பல்லை இளிக்கிறது ... ரெட்டையர்களாக இருந்த போது ரசிக்க  வைத்த சூர்யா ஓன் மேன் ஆர்மியாக மாறிய பிறகு நம்மை கவராமல் போனது திரைக்கதையின் ஓட்டை ... 

" மோதி விளையாடு " , " பொம்மலாட்டம் " படங்களின் தோல்வியால் காணாமல் போயிருக்க வேண்டிய காஜல் அகர்வால் " மஹதீரா  " வெற்றியால் மீண்டு வந்திருக்கிறார்... வெறும் பாடல்களுக்காக  மட்டும் இல்லாமல் படம் முழுவதும் மொழிபெயர்ப்பாளராக இவர் வருவது சிறப்பு ... உடலுடன் ஒட்டிய உடைகளுடன் வந்து உஷ்ணமும்  ஏற்றுவது கூடுதல் சிறப்பு ... 

கோடீஸ்வர விஞ்ஞானி தோற்றத்தில் கச்சிதமாக பொருந்துகிறார் சச்சின் ... அதை விட கச்சிதமாக பின்னணி குரல் அவருக்கு பொருந்தியிருக்கிறது ... இது போன்ற ஹிந்தி நடிகர்களை தமிழில் வாழ வைத்துக்கொண்டிருப்பதே இந்த குரல்கள் தானே ... இவர் மேல் உண்டான சஸ்பென்சை இடைவேளை வரை தக்க வைத்திருந்தாலும் , அது உடைந்த பிறகு ஓவர் ரியாக்ட் செய்ய விட்டு கெடுத்து விட்டார்கள் ... இவருக்கும் , சூர்யாவிற்கும் இடையேயான க்ளைமேக்ஸ் சீன்கள் எல்லாம் 80 களின் உச்சம் ...  

படத்தில் பணியாற்றியிருக்கும் ஒளிப்பதிவாளர் சௌந்தரராஜன் , எடிட்டர் அந்தோணி , சி.ஜி சூப்பர்வைசர் ஸ்ரீநிவாஸ் மோகன் , ஸ்டண்ட் மாஸ்டர் பீட்டர் ஹைன் ஆகியோரது உழைப்பு அபாரமானது , அதிலும் தீம் பார்க் ராட்டினங்களுக்கு இடையே நடக்கும் சண்டைக்காட்சியை பாராட்ட வார்த்தைகளில்லை ... இவர்கள் இல்லாமல் இது போன்ற படம் சாத்தியமாகியிருக்காது , ஹான்ட்ஸ் ஆப் ... 

" கால் முளைத்த " , " தீயே தீயே " பாடல்களால் தாளம் போட வைத்தாலும் பின்னணி இசைக்கு ஹாரிஸ் பெரிதாய் பிரயத்தனப்படவில்லை ... முதல் பாதியில் வசனங்களிலும் , இயக்குனருடன் இணைந்து அமைத்த திரைக்கதையிலும் எழுத்தாளர்கள் சுபா ( சுரேஷ் - பாலகிருஷ்ணன் ) நன்றாக தெரிகிறார்கள் ... இரண்டாம் பாதி தான் சொல்லிக்கொள்ளும்படியில்லை ... 

மார்கெட் ஆகக் கூடிய கதை , சூர்யாவின் நடிப்பு , சஸ்பென்சுடன் நகரும் முதல் பாதி , டெக்னிக்கல் ஆஸ்பெக்ட்ஸ் இவற்றால் மாற்றான் மனதில் பதிகிறான் ... அதிலும் சூர்யாக்களுக்குள் நடக்கும் சண்டை , ராட்டின சண்டைக்காட்சியின்  முடிவில் அடிபட்டுக் கிடக்கும் ஒரு சூர்யாவை காப்பாற்ற மற்றொரு சூர்யா போராடும் காட்சி , இரண்டு சூர்யாக்களின்  குணாதிசயங்களையும் ஒரு பாடலிலேயே காட்டிய விதம் இவைகளெல்லாம் சிலிர்க்க வைக்கின்றன ... 

ஒரு நாவலாக படிப்பதற்கு சூப்பரான கதையை சினிமாவுக்கேற்ற படி திரைக்கதையாக்குவதில் ஏற்பட்ட சறுக்கல் , என்ன தான் விஞ்ஞானியின் முயற்சி என்றாலும் ஒரே இதயத்தை வைத்துக்கொண்டு இருவர் நீண்ட நாட்கள் ஆரோக்கியமாக வாழ முடியுமா என்று நமக்கு தோன்றுகிற கேள்வி , எனர்ஜி ஆன் பால் பவுடரை ரஷ்யாவில் தொடர்ந்து ஏழு வருடங்கள் உபயோகித்தால் ஏற்படும் அவலங்களை பட்டியலிட்டு விட்டு இந்தியாவில் பத்து வருடங்களுக்கும் மேலாக அதை உபயோகப்படுத்துபவர்களுக்கு என்ன ஆனது என்பதை கூட திரைக்கதையில் காட்டாத அலட்சியம் , வில்லன் இங்கிருக்க துப்பறிகிறேன் பேர்வழி என்று சூர்யாவை வெளிநாட்டில் அலையவிட்ட திரைக்கதை , 

தன் ரகசியங்களை அம்பலப்படுத்தும் பென் டிரைவிர்க்காக எத்தனையோ கொலைகள் செய்யும்  ஒருவன் அதை ஏதோ லாண்டரி பில் வைப்பது போல சர்வ சாதாரணமாக ஆபீசில் வைப்பது , அதை எடுத்துக்கொண்டு உக்ரைன்  செல்லும் சூர்யா அந்த நாட்டு ராணுவ அதிகாரி தலையிலேயே துப்பாக்கியை வைத்துக் கொண்டு சென்டிமென்ட் டயலாக் பேசுவது உட்பட படத்தில் வரும் எக்கச்சக்க லாஜிக் சொதப்பல் சீன்கள் , நீண்டு கொண்டே போகும் க்ளைமேக்ஸ் இவைகளெல்லாம் மாற்றானை பார்த்து நம்மை ஏமாற வைக்கின்றன ... இரண்டாம் பாதியின் நீளத்தை கம்மி செய்து சஸ்பென்சை நீட்டியிருந்தால் நிச்சயம் மாற்றான் மயக்கியிருப்பான் ... 

ஸ்கோர் கார்ட் - 42 

டி 20 - இறுதிப்போட்டி ...

செப் 18 இல் ஆரம்பித்த டி 20 உலககோப்பை கிரிக்கெட் தொடர்  இன்று நடைபெறும் இலங்கை - மேற்கிந்திய தீவுகள் அணிகளுக்கிடையேயான இறுதிப்போட்டியோடு முடிவடைகிறது ... இலங்கை இறுதி வரை வரும் என்பது எதிர்பார்த்த ஒன்று தான் என்றாலும் மேற்கிந்திய தீவுகள் ஆஸ்திரேலியா வை மிக அபாரமாக ஜெயித்து இறுதிப் போட்டிக்கு தகுதி பெற்றிருப்பது டி 20 யில் எது வேண்டுமானாலும் நடக்கலாம் என்பதை மீண்டும் ஒரு முறை நிரூபித்திருக்கிறது ...

இலங்கை அணிக்கு சொந்த மண்ணில் போட்டி நடப்பது சாதகமாக இருந்தாலும் , க்ரிஸ் கெயில் , பிராவோ , பொல்லார்ட் போன்ற ஆட்டத்தின் போக்கையே மாற்றக்கூடிய அதிரடி ஆட்டக்காரர்கள் மேற்கிந்திய தீவுகள் அணியில் இருப்பதால் எதுவும் நடக்கலாம் ... இன்றைய ஆட்டம் மலிங்கா , மென்டிஸ் உள்ளிட்ட இலங்கை பந்து வீச்சாளர்களுக்கும் , மேற்கிந்திய தீவுகளின் மட்டையாளர்களுக்கும் இடையேயான போட்டியாகவே இருக்கும்.

2009 இல் டி 20 கோப்பையை தவறவிட்ட இலங்கை அணியும் , டி 20 இறுதி போட்டிக்கு ஒரு முறை கூட தகுதி பெற்றிராத மேற்கிந்திய தீவுகள் அணியும் இந்த முறை உலக கோப்பைக்காக மிக கடுமையாக போராடும் என்பதில் ஐயமில்லை ... ஆடிய ஐந்து போட்டிகளில் நான்கில் வெற்றி பெற்ற இந்திய அணி அரையிறுதிக்கு கூட தகுதி பெறாமல் போனது துரதிருஷ்டமே ... ஒப்பனர்களின் ஆட்டம் , தோனியின் சில முடிவுகள் , சேவாக் - தோனி பிரச்சனை , எதிரணிகளை மிரட்டாத வேகப்பந்து வீச்சு போன்றவையும் இந்தியாவின் வெளியேற்றத்திற்கு காரணமாய் அமைந்ததையும் நாம் மறுக்க முடியாது ... டி 20 யை பொறுத்தவரை இந்தியாவிற்கு ஒரே தீர்வு இள ரத்தங்களே ...

ஐ.பி.எல் போட்டிகளை நடத்தும் இந்தியா 2007 க்கு பிறகு நடந்த மூன்று டி 20 உலக கோப்பைகளிலும் ஒன்றில் கூட அரையிறுதிக்கு கூட தகுதி பெறாமல் போனது ஆழ்ந்து சிந்திக்க வேண்டிய விஷயம் ... தோனியை டி 20 மற்றும் டெஸ்ட் போட்டிகளின் கேப்டன் பதவியிலிருந்து தூக்க வேண்டுமென்கிற கோரிக்கையும் இப்போது வலுத்து வருகிறது ... தோனி  மட்டுமல்லாமல் ப்ளேச்சர் கோச்சாக நீடிப்பதும் தேவை தானா ? என்ற கேள்வியும் மேலோங்கி நிற்கிறது ...

நமது அணி வெற்றி பெறாத சோகத்தை ஓரங்கட்டி விட்டு இன்று இரண்டு தீவுகளுக்கிடையே நடக்கும் இறுதிப் போட்டியை பார்த்தோமானால் மேற்கிந்திய தீவுகள் வெற்றி பெற வேண்டுமென்பது என் விருப்பம் ... 75 களில் கிரிக்கெட் ஜாம்பவானாக இருந்த அணி பல வருடங்களாக  சறுக்கலில் இருந்து விட்டு  இப்போது தான் முன்னேறி வந்திருக்கிறது ... கிரீஸ் கெயில் தன்னம்பிக்கையோடு பேசுவதை பார்க்கும் போது அந்த அணி வெற்றி பெறும் என்பது போல தோன்றினாலும் நடப்பது டி 20 என்பதால் எதையும் உறுதியாக சொல்லிவிட முடியாது ... நீங்கள் எந்த அணி வெற்றி பெறும் என நினைக்கிறீர்கள் ? உங்கள் கருத்தை கீழே பதிவு செய்யவும் ...

நல்லதோர் வீணை குறும்படம் - 50000 ஹிட்ஸ் ...

" நல்லதோர் வீணை " குறும்படத்தை யூ டியூபில் அப்லோட் செய்து ஐந்து மாதங்களுக்குள் ஐம்பதாயிரம் ஹிட்ஸ்களை கடந்திருப்பதை பார்க்கும் போது  சமூக அக்கறையுள்ள நல்ல குறும்படங்களுக்கு எப்பொழுதுமே ரசிகர்களின் ஆதரவு இருக்கும் என்பது புலனாகிறது ... இதே போன்ற தரமான படங்களையே கொடுக்க வேண்டுமென்கிற அக்கறையையும் , பொறுப்புணர்வையும் இந்த ஆதரவு அதிகரித்திருக்கிறது ...

இந்த நேரத்தில் எனக்கு இது வரை ஆதரவளித்து வரும் அனைத்து பதிவுலக நண்பர்களுக்கும் , யூ டியூபில் குறும்படத்தை கண்டுகளித்ததோடு தங்கள் கருத்துக்களின் மூலம் உற்சாகம் அளித்த அனைத்து அன்பு உள்ளங்களுக்கும் , சமூக வலைத்தளங்கள்  மூலம் என்னை உற்சாகப்படுத்திய அன்பர்களுக்கும் , எனது குறும்படம் பற்றிய விமர்சனம் மற்றும் தகவல்களை வெளியிட்ட மூன்றாம்கோணம் ,  தமிழ் மீடியா , தினமணி.காம் போன்ற வலைப்பத்திரிக்கைகளுக்கும் , குறிப்பாக குறும்படத்தை ஒளிபரப்பு செய்த ஜெயா ப்ளஸ் தொலைக்காட்சிக்கும் எனது நன்றிகளை தெரிவித்துக் கொள்வதோடு , இந்த குறும்படத்தில் பணியாற்றிய  அனைவருக்கும் எனது மனமார்ந்த நன்றிகளை இந்த பதிவின் மூலம் தெரிவித்துக்கொள்வதில் மிக்க மகிழ்ச்சியடைகிறேன் ...

" நல்லதோர் வீணை " குறும்படத்தை கீழே பார்க்கவும் ...

டி 20 - யுத்தம் ஆரம்பம் ...

இன்னும் சிறிது  நேரத்தில் இந்தியா - பாகிஸ்தான் நாடுகளுக்கிடையே கிரிக்கெட் யுத்தம் ஆரம்பிக்க போகிறது ... இந்தியா டி 20 உலக கோப்பையை வெல்லாவிட்டாலும் பாகிஸ்தானிடம் தோற்கக்கூடாது என்று நினைக்கும் ரசிகர்கள் தான் ஏராளம் , அந்த அளவிற்கு இரு நாடுகளில் உள்ள ரசிகர்கள் மட்டுமல்லாமல் உலகமே ஆவலுடன் எதிர்பார்க்கும் போட்டியாகவே இரு நாடுகளுக்கிடையேயான போட்டி எப்பொழுதும் இருக்கும் ...

இது வரை 7 உலகக்கோப்பை போட்டிகளில் ( 2 டி 20 , 5 50 ஓவர் )  பாகிஸ்தானுடன் ஆடியுள்ள இந்தியா ஒன்றில் கூட தோற்றதில்லை என்று வரலாறு சொன்னாலும் தற்போது பாகிஸ்தான் அணியினரின் தொடர் வெற்றியும் , சேவாக் - தோனி இடையேயான பனிப்போரும்  இந்தியா வெற்றி பெறுவது அவ்வளவு  எளிதல்ல  என்பதை தெளிவாக காட்டுகின்றன ... 

இன்று இந்திய அணி ஹர்பஜன் , சாவ்லாவை விடுத்து சேவாக் , பாலாஜி யுடன் களமிறங்குவதாக தோனி அறிவித்துள்ளார் ... பாகிஸ்தான் அணியில் எந்த மாற்றமுமில்லை ... டாஸ்  ஜெயித்திருக்கும் பாகிஸ்தான் முதலில் பேட் செய்யப் போகிறது ... ஜெயிக்கப் போவது யார் ? மூன்றரை மணி நேரம் எல்லோரும் காத்திருப்போம் ... 

தாண்டவம் - தடுமாற்றம் ...

தெய்வதிருமகள் வெற்றிக்கு பிறகு விக்ரம் - இயக்குனர் விஜய் இருவரும் அதே டீமுடன் மீண்டும் தாண்டவத்தில் கை கோர்த்திருக்கிறார்கள் ... படம் வருவதற்கு முன்பே கதை என்னுது என்று உதவி இயக்குனர் பொன்னுசாமி எழுப்பிய குற்றச்சாட்டும் , அதை தொடர்ந்து அவருக்கு நியாயம் வழங்க முடியவில்லை என்று அமீர் உட்பட எட்டு பேர் பதவி விலகியதும் பரபரப்பை ஏற்படுத்தினாலும் , படத்தை பார்த்த பிறகு இதுக்காகவா இப்படி அடிச்சுக்கிட்டாங்க என்கிற நினைப்பு மட்டுமே மேலோங்கி நிற்கிறது ...

2011 இல் லண்டனில் ஒரு குண்டு வெடிப்பு , அதை தொடர்ந்து வரிசையாக சில கொலைகள் , கொலைகளை துப்பறியும் வீரகத்தி பிள்ளை ( நாசர் ) பார்வையிழந்த கெனி ( விக்ரம் ) தான் இதற்கு காரணமென்று கண்டுபிடிக்கிறார் ... பிறகு பார்வையிழந்தவர் கெனி இல்லை , அவர் எக்ஸ் ரா ஆபீசர் சிவா என்பதையும் , எதற்கு கொலைகள் செய்தார் என்பதையும் எந்த வித ஆக்ரோஷமும் இல்லாமல் நீ .. ள .. தாண்டவமாய் சொல்லியிருக்கிறார்கள் ... கொலாட்ரல் , டேர் டெவில் போன்ற படங்களை நினைவு படுத்தும் கதை தான் என்றாலும் விஜய்க்கு இது ஒன்றும் புதிதில்லை என்பதால் விட்டு விடுவோம் ...

கண் பார்வையிழந்த கெனி , ரா ஆபிசர் சிவா என்று இரண்டு தோற்றத்தில் வரும் விக்ரம் உடல் மொழியாலும்  , உடற்கட்டாலும் நம்மை கவர்கிறார் , ஆனால் முகம் மட்டும் வயதை காட்டிக் கொடுக்கிறது ... இரண்டு , மூன்று அடிகளில் எதிரிகளை இவர் வீழ்த்தும் சண்டைக்காட்சிகள் அருமை ... அனுஷ்கா எனக்கு பிடித்த நடிகை , ஆனாலும் இந்த படத்தில் ஹோண்டா ஆக்டிவாவில் வரும் ஆன்டி  போல தழுக் , முழுக் என்று இருக்கிறார் ... இவர் நடிப்பதற்கு ஒன்றும் பெரிதாய் பிரயத்தனப்படவில்லை... டூயட்  காட்சிகளில் இளமை ததும்பவில்லை , மற்றவை ( சரி விடுங்க ) ...

எமி பார்வையிழந்த கெனிக்கு உதவும் கதாபாத்திரத்தில் நடித்திருக்கிறார் ... சமூக சேவை என்ற பெயரில் சர்ச்சில் இவருடன் சேர்ந்து போட்டோக்ராபர் செய்யும் லூட்டிகள் சிரிக்க வைக்கின்றன , மற்றபடி சொல்வதற்கு பெரிதாய் ஒன்றுமில்லை ... கொலை நடக்கும் இடங்களில் தானாய் வந்து மாட்டிக்கொள்ளும் டாக்ஸி டிரைவர் வேடத்தில் சந்தானம் ... நகைச்சுவைக்கு நல்ல ஸ்கோப் இருந்தும் படத்தின் முடிவு முன்னமே தெரிந்து விட்டதோ என்னமோ மனிதர் டல்லாகவே இருக்கிறார் ...

துப்பறியும் இலங்கை தமிழர் வேடத்தில் வரும் நாசர் அந்த ஸ்லாங்கோடு ஒத்துப்போக முடிந்த வரை முயற்சித்திருக்கிறார் ... தெலுங்கு நடிகர் ஜெகபதிபாபு வை விக்ரமின் நண்பனாக இருந்து கொண்டே பணத்திற்காக வில்லனாக மாறுவதை போல காட்டியிருப்பது சலிப்பை தருவதை தவிர வேறொன்றும் செய்யவில்லை ... இவருக்கும் , விக்ரமிற்கும் இடையேயான க்ளைமேக்ஸ் சண்டைகாட்சி விறுவிறுப்பு ... விக்ரமின் அம்மாவாக சரண்யா , மாமாவாக எம்.எஸ்.,பாஸ்கர்  , சில சீன்களே வந்தாலும் " தப்பாச்சே " என்று சொல்லி சிரிக்க வைக்கும் தம்பி ராமையா , பாலாஜி , லக்ஷ்மிராய் போன்றோரும் படத்தில் இருக்கிறார்கள் ...

நீரவ் ஷாவின் ஒளிப்பதிவு படத்திற்கு பெரிய பலம் ... விஜய் - ஜி.வி  கூட்டணி வழக்கம் போல கிளிக் ஆகியிருக்கிறது ... 25 வது படத்திற்காக ஜி.வி மெனக்கட்டிருப்பது " ஒரு பாதி கதவு " , " உயிரின் உயிரே " போன்ற மெலடிகளில் நன்றாகவே தெரிகிறது ...

பழி வாங்கும் கதை என்றாலும் வன்முறையையும் , வழக்கமான ஹீரோயிஷத்தையும் தவிர்த்திருப்பது , பாடல் காட்சிகளை படமாக்கிய விதம், மெதுவாக கொண்டு  சென்றாலும் முதல் பாதியில் முடிந்தவரை சஸ்பென்ஷை தக்க வைத்தது , விக்ரம் - அனுஷ்கா திருமண காட்சிகள் , கண் பார்வை இல்லாவிட்டாலும் ஒலி எழுப்பி அது ஏற்படுத்தும் எதிரலைகள் மூலம் ( எக்கோலொகேஷன் ) எதிரில் இருப்பவர்களை அடையாளம் காணும் முறையில் விக்ரம் பயிற்சி எடுப்பது போன்றவை தாண்டவத்தில் நம்மை லயிக்க வைக்கின்றன ...

முந்தைய படமான  தெய்வதிருமகள் - திருட்டு தேவதை  என்ற போதும்  திரைக்கதையாலும் , விக்ரம் - சாரா நடிப்பாலும் நம்மை ரசிக்க வைத்த விஜய் பெரிதும் கவராத கதை , மிக நீளமான திரைக்கதை , விக்ரம் நண்பனையே துரோகியாக இனம் கண்டு கொள்ளும் காட்சிகள் , அரைகுறையாய் கொடுக்கப்பட்ட த்ரில்லர் , ஆங்காங்கே மட்டும் மனதை தொடும் காதல் , ரசிக்க வைக்காத நகைச்சுவை  இவற்றால் தாண்டவத்தில் நிறையவே தடுமாறியிருப்பது நன்றாக தெரிகிறது...

ஸ்கோர் கார்ட் : 40  

டி 20 - இந்தியா அபார வெற்றி ...

இலங்கையில் நடந்து வரும் டி 20 உலககோப்பை கிரிக்கெட் போட்டியில் இன்று இங்கிலாந்தை இந்தியா 90 ரன்கள் வித்தியாசத்தில் எளிதாக வெற்றி பெற்றது ... ஏற்கனவே இரண்டு அணிகளும் சூப்பர் 8 க்கு தகுதி பெற்று விட்ட போதிலும் அதற்கு முன்னோடியாக அமைந்த இந்த ஆட்டத்தில் இந்தியா நடப்பு டி 20 சேம்பியனை அபாரமாக வெற்றி பெற்றிருப்பது குறிப்பிடத்தக்கது ...

இந்திய அணியில் சேவாக் , ஜாகிர் , அஸ்வின் ஆகியோருக்கு ஒய்வு தரப்பட அதற்கு பதில் ஹர்பஜன் , சாவ்லா , திந்தா ஆகியோர் சேர்க்கப்பட்டனர் ... டாஸ் ஜெயித்த இங்கிலாந்து அணி கேப்டன் பிராட் இந்தியாவை பேட் செய்ய பணித்தார் ... துவக்க ஆட்டக்காரர்களாக கம்பீர் மற்று பதான் இறங்கினர் ... பதான் எட்டு ரன்களில் அவுட் ஆகி விட கம்பீர் - கோலி ஜோடி நிதானமாக ஆடி 50 ரன்களுக்கு மேல் சேர்த்தது ... கடைசியில் ரோஹித் சர்மா 50 ரன்களுக்கு மேல் எடுத்தும் ஆட்டமிழக்காமல் இந்தியா 170 ரன்களை எட்டுவதற்கு காரணமாக  அமைந்தார் ...

அடுத்து 171 ரன் இலக்கை நோக்கி ஆட வந்த இங்கிலாந்திற்கு முதல் ஓவரிலேயே விக்கட் எடுத்து பதான் அதிர்ச்சி கொடுத்தார் , அதை தொடர்ந்து ஹர்பஜன் - சாவ்லா ஜோடியின் சுழற்பந்துவீச்சை சமாளிக்க முடியாமல் இங்கிலாந்து வீரர்கள் 80 ரன்களுக்கு சுருண்டனர் ... இங்கிலாந்து எடுத்த குறைந்தபட்ச டி 20 ஸ்கோர் இதுவே ஆகும்... நான்கு ஓவர்கள் பந்து வீசி 12 ரன்கள் மட்டுமே கொடுத்து 4 விக்கட்களை வீழ்த்திய ஹர்பஜன் சிங்கிற்கு மேன் ஆப் தி மேட்ச் விருது கொடுக்கப்பட்டது ... அடுத்து நடக்கவிறுக்கும் சூப்பர் 8 போட்டிகளில் இந்தியா மிகுந்த தன்னம்பிக்கையுடன் இறங்கும் என்பதில் சந்தேகமேயில்லை ...

ஸ்கோர் : இந்தியா 170 / 4 ( ரோஹித் 52 * )
                     இங்கிலாந்து 80 ஆல் அவுட் ( ஹர்பஜன் 4 / 12 )

சாட்டை - சடுதியில் தவறவிட்ட அடி ...

பிரபல இயக்குனர்கள் மற்ற இயக்குனர்களை வைத்து தயாரிக்கும் படங்கள் தரமானவையாக இருக்கும் என்பதற்கு சமீபத்திய உதாரணம் " சாட்டை " ... அதற்காக இப்படத்தை காதல் , பசங்க வரிசையில் சேர்த்து விட முடியாது , ஆனால் முதல் படத்திலேயே ஒரு கருத்தாழம் மிக்க கதையை சொல்ல முற்பட்டதற்காக அறிமுக இயக்குனர் அன்பழகனை பாராட்டலாம் ...
நம்மவர் ஸ்டைல் கதை , இப்படத்தில் கல்லூரிக்கு பதில் அரசு மேல்நிலை பள்ளி , மாணவர்களுக்கு பதில் உடன் பணிபுரியும் சக ஆசிரியர்களையும் சேர்த்து ஒரு ஆசிரியர் திருத்துவது மட்டும் மாறுதல் ...

திருவண்ணாமலையில் உள்ள ஒரு அரசு பள்ளிக்கு மாற்றலாகி வருகிறார் தயாளன் (  சமுத்திரக்கனி  ) , அங்கோ ஏ.ஹெச்.எம் சிங்கம்பெருமாள் ( தம்பி ராமையா ) தலைமையில் அனைத்து ஆசிரியர்களும் சும்மா சம்பளம் வாங்கிக் கொண்டு படிப்பு உட்பட அனைத்திலும் பள்ளியை பின்தங்கிய நிலையிலேயே வைத்திருக்கிறார்கள் , இதை தட்டிக் கேட்க முடியாத நிலைமையில் இருக்கிறார் ஹெச்.எம் ஜூனியர் பாலையா ( இதற்கு தேவையான விளக்கம் எதுவும் படத்தில் இல்லை ) ... தனியார் பள்ளிகளுக்கு நிகராக அரசு பள்ளியை  சமுத்திரக்கனி   எப்படி மாற்றிக்காட்டுகிறார் என்பதை மாணவர் பழனி
( யுவன்) ,  மாணவி அறிவழகி (  மகிமா  ) இவர்கள் இடையேயான காதல் , தம்பி ராமையாவின் வில்லத்தனம் , மாணவன் பாண்டியின் காமெடி மற்றும் பாசிடிவ் சாங் உட்பட பல சினிமாத்தனங்களை கயிறாக திரித்து சாட்டையை கொடுத்திருக்கிறார்கள் ...

சமுத்திரக்கனி தயாளனாகவே நம் மனதில் பதிகிறார் ... முக பாவங்கள் குறைவெனினும் அதை தன்  குரலால் சமன் செய்கிறார் ... இவர் தன்னம்பிக்கை வசனங்கள் பேசும் போது தியேட்டரில் கைதட்டல்கள் கிடைத்தாலும் படம் நெடுக அதையே செய்வதால் போரடிக்கறது ... ஒரு விதமான ஹீரோயிஸத்துக்குள் இவர் கேரக்டரை புகுத்தாமல் தவிர்த்திருந்தால் இன்னும் அழுத்தமாகவே நம் மனதில் பதிந்திருப்பார் ...

இவருக்கு நிகரான கதாபாத்திரம் தம்பிராமையாவினுடையது ... மனிதர் வெளுத்து வாங்கியிருக்கிறார் ... தன்னிடம் கடன் வாங்கி விட்டு வட்டி தராத ஆசிரியர்களை கலாய்ப்பது , ஆசிரியர்கள் மீட்டிங்கில்  சமுத்திரக்கனியை மடக்குவது என்று ரசிகர்களை சிரிக்க வைத்தாலும் போக போக ஓவர் ஆக்டிங் செய்து நிறையவே வெறுப்புமேற்றுகிறார் ... காமெடி அல்லது குணச்சித்திரமான கேரக்டராக இவரை வடிவமைக்காமல்  சமுத்திரக்கனியை கொலை செய்யப் போகும் அளவிற்கு பக்கா வில்லனாக மாற்றியது சாட்டையின் சறுக்கல் ...

+2 மாணவன் பழனியாக வரும் யுவனின் முகம் குழந்தைத்தனமாகவும் , தாடி , மீசை மற்றும் அவர் கண்களில் காட்டும் கோபம் இவைகளெல்லாம் ஓட்ட வைத்தது போல ரொம்ப செயற்கையாகவும் இருக்கின்றன ... புதுமுகம் மகிமா அழகாக மட்டுமல்லாமல் நன்றாக நடிக்கவும் செய்திருக்கிறார் ... படிப்புக்காக இவர் மன்றாடும் காட்சிகள் அருமை ... கடைசியில் வழக்கம் போல இவரும்  காதல் வயப்படுவது போல காட்டாமல் இருந்திருந்தால் இவர் கேரக்டருக்கு இன்னும் மெருகேறியிருக்கும் ...

ப்ளாக் பாண்டி , ஜூனியர் பாலையா , குட்லக் லக்ஷ்மன்  ,சமுத்திரக்கனியின் மனைவியாக  நடித்திருப்பவர் இப்படி படத்தில் நிறைய பேர் பொருத்தமாகவே நடித்திருக்கிறார்கள் ... இமானின் இசையில் பழைய நெடி இருந்தாலும் பாடல்கள் யுவபாரதியின் வரிகளோடு சேர்ந்து கேட்பதற்கு இனிமையாக இருக்கின்றன ...

பொறுப்பில்லாமல் நடந்து கொள்ளும் அரசு பள்ளி ஆசிரியர்களின் நிலை , மாணவர்களிடையே நண்பன் போல பழகி அவர்களின் குறைகளை  கலையாமல் அதை ஊதி பெரிதாக்கும் அவர்களுடைய போக்கு , தற்போதைய முன்னேற்றங்களுக்கு ஏற்றபடி தங்களை மேம்படுத்திக்கொள்ளாத பள்ளி நிர்வாகம் போன்றவற்றை சாட்டை கொண்டு விளாசியிருக்கிறார் இயக்குனர்... அதேநேரம் அரசு கெடுபிடிகளால் மாணர்வகளை சமாளிக்க முடியாமல்  திணறும் அரசு பள்ளி ஆசிரியர்களின் நிலையையும் கொஞ்சம் சொல்லியிருக்கலாம் ...

படம் நன்றாக ஆரம்பித்து பிறகு சமுத்திரக்கனி மேல் காமுகன் பழி விழுந்து அவரை மக்கள் அடித்து துரத்துவது , ஒரு போட்டியில் கூட கலந்து கொண்டிராத ஒரு பள்ளி மாவட்ட அளவிலான சேம்பியன் பட்டம் வெல்வது , சாகக்கிடக்கும் சமுதிரக்கனிக்காக மாணவர்கள்  பாடுவது , அவர் மனைவி பாசிட்டிவாக பேசுவது , மிகைப்படுத்தப்பட்ட தம்பி ராமையா கேரக்டர் இவைகளெல்லாம படத்தை சாட்டை கொண்டு அடிக்கின்றன ... நாடக , சினிமாத்தனங்களை தவிர்த்து ஒரு நேர்மையான நிகழ்வாக படத்தை இயக்குனர் பதிவு செய்திருந்தால் நிச்சயம் எழுந்து நின்று சல்யூட் அடித்திருக்கலாம் ...

ஸ்கோர் கார்ட் : 41 

ட்வென்டி 20 உலககோப்பை ...

உலககோப்பை ட்வென்டி 20 கிரிக்கெட்  இன்று இலங்கையில் தொடங்குகிறது. மொத்தம் உள்ள நான்கு பிரிவுகளில் இந்தியா ஏ பிரிவில் இங்கிலாந்து மற்றும் ஆப்கானிஸ்தான் உடன் களம் இறங்குகிறது ... முதல் டி 20 உலககோப்பையை 2007 ஆம் ஆண்டு வென்ற இந்திய அணி அடுத்த இரண்டு உலகக்கோப்பைகளிலும் சோபிக்கவில்லை ...

இது வரை நடந்துள்ள மூன்று டி20 உலககோப்பைகளையும் இந்தியா , பாகிஸ்தான் , இங்கிலாந்து உட்பட மூன்று வெவ்வேறு நாடுகள் வென்றிருப்பதும் , இந்த முறை யார் வெல்வார்கள் என்பதை உறுதியாக கணிக்க முடியாததுமே ட்வென்டி 20 யின் சிறப்பம்சங்கள்... இலங்கைக்கு எதிராக இந்தியா சமீபத்தில் ஒரு நாள் தொடர் மற்றும் ஒரு ட்வென்டி 20 ஐ அந்த நாட்டிலேயே வென்றிருப்பது இந்திய அணிக்கு சாதகமாக  அமையுமா என்பதை பொறுத்திருந்து தான் பார்க்க வேண்டும் ...

இந்திய அணியில் கோலி , பதான் , ரெய்னா ஆகியோர் பார்மில் இருப்பதும் , யுவராஜ் சிங் மீண்டும் அணிக்கு திரும்பியிருப்பதும் நம்பிக்கை கொடுக்கின்றன , அதே சமயம் சென்னையில்  நடைபெற்ற நியூசிலாந்துக்கு எதிராக எளிதாக ஜெயித்திருக்க வேண்டிய ஆட்டத்தை தோனியின் மெத்தனமான போக்கால் தோற்றது டீமின் நம்பகத்தன்மையை பாதிக்கிறது. பயறிசி ஆட்டத்தில் இலங்கையை  எளிதாக வென்ற இந்தியா 185 ரன்கள் அடித்தும் பாகிஸ்தானிடம் பரிதாபமாக தோற்றுப் போனதும் இந்திய அணியை நம்ப முடியாதற்கு ஒரு சமீபத்திய உதாரணம் ...

மற்ற அணிகளை பொறுத்தவரை பாகிஸ்தான் , ஆஸ்திரேலியா , வெஸ்ட் இண்டீஸ் போன்ற அணிகளுக்கு நல்ல வாய்ப்பு இருப்பதாகவே கருதுகிறேன். மேற்சொன்ன அணிகள் எல்லாம் டி 20 தர வரிசை  பட்டியலில் பின் தங்கியிருந்தாலும் அப்ரிடி  , ஹஸ்சி , கிரீஸ் கெய்ல் போன்ற அதிரடி ஆட்டக்காரர்கள் அந்த அணிகளில் இருப்பது குறிப்பிடத்தக்கது ...

நடப்பு சேம்பியன் இங்கிலாந்து , போட்டியை நடத்தும் இலங்கை , இந்தியாவை வென்று நம்பிக்கையில் இருக்கும் நியூசிலாந்து போன்ற அணிகளையும் நாம் குறைத்து மதிப்பிட்டு விட முடியாது ... எந்த அணி ஜெயித்தாலும் நடப்பது உலககோப்பை டி 20 என்பதால் அடுத்த இருபது நாட்கள் ரசிகர்களுக்கு விறுவிறுப்பில் பஞ்சமிருக்காது என்று மட்டும் அடித்து சொல்லலாம் ...

சுந்தரபாண்டியன் - சறுக்க மாட்டான் ...

சசிகுமார் தயாரிப்பில் அவருடைய உதவி இயக்குனர் பிரபாகரன் இயக்குனராய் அறிமுகமாகியிருக்கும் படம் சுந்தரபாண்டியன் ... சசிகுமார் - சமுத்திரக்கனி பாணியில் வரும் வழக்கமான நண்பர்களை சுற்றி பிண்ணப்பட்ட கதையை தொய்வில்லாமல் சொல்லியிருக்கிறார் அறிமுக இயக்குனர் ... " சுப்ரமணியபுரம் " மாதிரி ஒரு படம் கொடுத்ததே  ஜென்மத்திற்கும் போதுமென்று சசிகுமார் நினைத்து விட்டாரோ என்னமோ , இதில் ஒரு முழுமையான கமர்சியல் ஹீரோவாக தன்னை முன்னிறுத்த முயற்சித்திருக்கிறார் ...

ஊரே மெச்சும் பெரிய குடும்பத்தின் ஒரே வாரிசு சந்தரபாண்டியன் ( சசிகுமார் ) , கல்லூரி படிப்பை முடித்துவிட்டு நண்பர்களுடன்  வெட்டியாக ஊரை சுற்றுவதை தவிர இவருக்கு உருப்படியாக ஒரு வேலையும் இல்லை ...                 ( இன்னும் எத்தன படத்துக்கு தான் சினிமால  ஹீரோவ இப்படியே காட்டப் போறாங்களோ ) ... வேலை வெட்டி ஏதும் இல்லாததால் தன் நண்பன் அறிவு
 ( இனிகோ பிரபாகரன் ) நான்கு மாதங்களாய் ஒரு தலையாய் காதலித்து வரும் அர்ச்சனாவுடன் ( லக்ஷ்மி மேனன் ) அவரை சேர்த்து வைக்கும் மாபெரும் பணியை கையிலெடுக்கிறார் சுந்தபாண்டியன் ... இதன் பிறகு என்ன நடக்குமென்பதை நாம் மின்சாரகனவில் ஆரம்பித்து சமீபத்தில் வந்த ராட்டினம் வரை பல படங்களில் பார்த்துவிட்டதால் அதை பற்றி வேறெதுவும் சொல்வதற்கில்லை... இரண்டாம் பாதியை சுப்ரமணியபுரம் , நாடோடிகள் பாணியில் ட்விஸ்ட் வைத்து முடித்திருக்கிறார்கள் ...

சசிகுமார் நடிப்பில் மெருகேறியிருக்கிறார் என்று சொல்லலாம் , ஆனால் அவருக்கென்று ஒரு ஸ்டைலை உருவாக்காமல் ரஜினி ரசிகன் என்ற போர்வையில் சூப்பர் ஸ்டாரின் ஸ்டைலை எதற்கு பின்பற்றினார் என்று தெரியவில்லை ... மாஸ் ஹீரோவாக ஆக வேண்டுமென்ற ஆசை அவர் முகத்திலும் , அவருக்கு கொடுக்கப்பட்ட பில்டப்புகளிலும் நன்றாக தெரிகிறது.
சசிக்கென்று தனியாக மார்க்கெட் இருக்கலாம் , அவர் வசனத்திற்கு ரசிகர்கள் கை தட்டலாம் , அவர் நடிப்பில் மினிமம் கியாரண்டியை படங்கள் தொடலாம் , ஆனால் சசிகுமார் சுப்ரமணியபுரம் போல ஒரு படத்தை கொடுக்க முடியாவிட்டாலும் அதற்கான முயற்சியை கூட  எடுக்காமலிருந்தால் நாளைய வரலாறு நிச்சயம் அவரை பழிக்கும் ...

அறிமுக நாயகி லக்ஷ்மி தோற்றத்திலும் , மேக்கப் இல்லாத முகத்திலும் மதுரைப் பெண் போல இருந்தாலும் உயரம் மட்டும் இடிக்கிறது ... இவர் கேரக்டரை திமிர் பிடித்தவள் என்று காட்டுவதற்காக உம்மனாமூஞ்சியாகவே விட்டுவிட்டார் இயக்குனர் ... அமலா பாலின் தூரத்து சொந்தம் போல இருக்கிறார் லக்ஷ்மி மேனன் ... " கும்கி " யிலும் இவர் தான் ஹீரோயின் என்பது கூடுதல் தகவல் ...
( இவுகளுக்கு மட்டும் நுழையும் போதே எப்படி தான் இம்புட்டு சான்ஸ் கிடைக்குதோ ) ...

சசிக்கு இணையான கதாபாத்திரத்தில் வரும் இனிகோ அவரை விட இளமையாக இருக்கிறார் ... இவர் இப்படி தான் நடந்து கொள்வார் என்று முன்னமே யூகிக்க முடிந்து விடுவதால் ட்விஸ்டில் பெரிய சுவாரசியம் இல்லை ... பிஸ்ஸா படத்தில் ஹீரோவாக நடித்துக் கொண்டிருக்கும் விஜய் சேதுபதி இதில் முக்கியமான நண்பன் பாத்திரத்தில் நடித்திருக்கிறார் , ஆனால் பட முடிவில் மட்டுமே இவருக்கு முக்கியத்துவம் தரப்பட்டிருக்கிறது.

சசியின் நண்பனாக வரும் சூரியும் , லக்ஷ்மி மேனனை  டாவடிப்பதாய் ரவுசு கட்டும் அப்புக்குட்டியும் படத்தின் பெரிய பக்கபலங்கள் ... கதை என்று பெரிதாக எதுவும் இல்லாத இந்த படத்தை முதல் பாதி முழுவதும் போரடிக்காமல் பார்க்க வைப்பது இந்த இருவருமே , அதிலும் சூரி படம் நெடுக கட்டையை கொடுத்து பட்டையை கிளப்புகிறார் ... வடிவேலுவின் மேனரிசத்தை இவர் கொஞ்சம் தவிர்க்கலாம் ...

இடைவேளை வரை ராட்டினம் படத்தின் கருவை வேறு மாதிரி களத்தில்  கொடுத்திருக்கிறார்கள் , இடைவேளையில் போலீஸ் வந்து சசியை கைது செய்யும் சீன் கூட அதே போல இருக்கிறது ... இடைவேளைக்கு பிறகு படம் நண்பர்களின் துரோகம் என்ற களத்திற்குள்  நுழைகிறது  ... சசிகுமாரின் முந்தைய படங்கள் போல சாதி குறியீடுகள் மறைமுகமாக இல்லாமல் இதில் நேரடியாகவே வருகிறது ... வெண்ணிலா கபடி குழுவில் " சாதி , சாமி இந்த ரெண்டு பாரத்தையும் இறக்கி வச்சாத்தான் வேகமா போக முடியும் " என்று பாஸ்கர் சக்தி வசனம் எழுதியிருப்பார் , ஆனால் அது சினிமாவில் இருக்கும் நிறைய பேருக்கே  இன்னும் போய் சேராதது வருத்தமே ...

புதிதாய் சொல்லப்படாத கதை , சுப்ரமணியபுரத்தை நினைவு படுத்தும் க்ளைமேக்ஸ் , சசி " குத்தினது நண்பனா இருந்தா செத்தாலும் சொல்லக்கூடாது அதான் நட்பு " என்றெல்லாம் வசனம் பேச , கூட இருப்பவர்களோ நயவஞ்சகர்களாக மாறுவது என்னமோ ஒரு தலை காதல் போல இது ஒரு தலை நட்போ என்கிற அளவிற்கு ஏற்படுத்தும்  சலிப்பு , சசிக்கும் , சாதிக்கும் கொடுக்கப்படும் பில்டப்ஸ் , பாடல்கள் இவையெல்லாம் சுந்தரபாண்டியனை சறுக்க  நினைத்தாலும்  ,

அருமையான பாத்திர தேர்வு , சின்ன சின்ன கேரக்டர்கள் மூலம் கூட சுவாரசியமாக படத்தை கொண்டு சென்றது  , சசி - சூரி அலப்பறை , இரண்டரை மணி நேரம் மண் மனம் மாறாமல் ஏதோ நாம் உசிலம்பட்டிக்கு வந்து விட்டோமோ என்று நினைக்குமளவிற்கு நேட்டிவிட்டியோடு பார்ப்பவர்களை படத்தோடு ஒன்ற செய்த விதம்  , போரடிக்காத திரைக்கதை போன்றவை கமர்சியலாக சுந்தரபாண்டியனை சறுக்க  விடாமல் நிறுத்துகின்றன ...

ஸ்கோர் கார்டு : 42 

ஞாபகங்கள் ...

ஒரு வயதில் உனக்கு

காது  குத்திய போது 

உன்னை விட 

அதிகமாய் நான் 

அலறிய ஞாபகம் ...

ஐந்து வயது ஆனபோதும் 

தனியாய் நடக்காமல் 

என் கைகள் கோர்த்தே 

நீ நடந்த ஞாபகம் ...

பத்து வயதில் உன் 

அழுகையை நிறுத்த 

மரத்திலிருந்து குதித்து 

என் கால்களை 

உடைத்துக்கொண்ட ஞாபகம் ...

பனிரெண்டு வயதில் 

தூக்கத்திலே  என் 

கால்கள் மேல் படர்ந்திருந்த 

உன் கால்களை 

அகற்றும் போது 

நீ ஒரு முறை 

உற்றுப்பார்த்து விட்டு 

மீண்டும் கண்களை 

மூடிக்கொண்ட  ஞாபகம் ...

பதினைந்து  வயதில் 

உன்னை கடைசியாய் 

பாவாடை சட்டையில் 

பார்த்த ஞாபகம் ... 

பதினெட்டு வயதில் 

என்னுடன் தனியாக 

பேசிக்கொண்டிருந்த உன்னை 

உன் அம்மா 

போட்ட சத்தத்தால் 

பலர் 

திரும்பிப்  பார்த்த ஞாபகம் ... 

இருபத்தியொரு  வயதில் 

நீ படிப்பை 

முடித்த பிறகும் 

நான் நண்பர்களுடன் 

ஊர் சுற்றிக் கொண்டிருந்த ஞாபகம் ...  

இருபத்தி மூன்றாம் வயதில் 

உனக்கு மாப்பிள்ளை 

பார்க்க ஆரம்பித்த  

போது  

என்னை வேலை 

தேடச் சொல்லி 

நீ வற்புறுத்திய ஞாபகம் ... 

இருபத்தைந்தாம் வயதில் 

உன் கழுத்தில் தாலி 

ஏறிய பிறகு தான் 

அயல்நாடு செல்வதில் 

உனக்கும் ஆசை 

இருந்தது என்பதை 

நான் தெரிந்து கொண்ட ஞாபகம் ... 

இருபத்தியேழாம் வயதில் 

உனக்கு பிறந்த 

முதல் பையனுக்கு 

என் பெயரை 

வைத்ததாய் ஞாபகம் ... 

நீதானே என் பொன்வசந்தம் - புது ராஜ வாழ்க்கை ஆரம்பம் ...

வரலாற்றுப் பாடத்தில் சிந்து சமவெளி காலம்  , முகலாயர் காலம் , ஆங்கிலேயர் ஆட்சிக் காலம் என்றெல்லாம் படித்திருப்போம் , ஆனால் எக்காலத்திற்கும் கேட்கக் கூடிய இசையைக் கொடுப்பவர் இசைஞானி ... இன்றைய இளைஞர்கள் மத்தியில் தன் இயக்கத்திற்காக மட்டுமின்றி படத்தின்   இசைக்காகவும் பேசப்படுபவர் கெளதம் மேனன் ... இந்த இருவரும் இணைந்தால் எப்படியிருக்கும் என்று நினைக்கும் போதே வீசுகிறதே ஒரு சுகந்தம் , இணைந்ததன் விளைவே " நீதானே என் பொன்வசந்தம் " ...

70 களில் " அன்னக்கிளி ஒன்னத்தேடுதே " , " செந்தூரப்பூவே " மூலம் கவனிக்க வைத்தவர் , 80 களில் " இளைய நிலா " , " " பனிவிழும் மலர்வனம் " , " பூவே செம்பூவே " போன்ற பாடல்கள் மூலம் நம்மை கட்டிப்போட்டவர் , 90 களில் புதியவர்களின் வருகைக்குப் பிறகும் " இஞ்சி இடுப்பழகி " , " தென்றல் வந்து " ,

" என்னை தாலாட்ட " மூலம் இசைக்கு ராஜா நான் தான் என்று மீண்டுமொருமுறை நிரூபித்தவர் , 2000 க்கு பிறகு " ஒளியிலே தெரிவது " ,

" உன்னவிட உலகத்தில் " , " இளங்காத்து வீசுதே " என்று சொக்க வைத்தவர் இப்படி இசைஞானி தன் இசையால் நம் உயிரோடு கலந்து உறவாடியதை சொல்லிக்கொண்டே போகலாம் ... 2010 க்கு பிறகு " அழகர்சாமியின் குதிரை " ,

" தோனி" போன்ற படங்கள் பின்னணி இசைக்காக பேசப்பட்டாலும் , பாடல்களின் இசைக்கான ஒரு வெற்றிடத்தை " நீதானே என் பொன்வசந்தம் " நிரப்பியிருக்கிறது என்று சொல்லலாம் ...

படத்தின் பாடல்களை கேட்டவுடனே எந்த ஒரு முடிவுக்கும் வராமல் பொறுமையாக இரண்டு நாட்கள் கேட்டுப் பார்ப்பவர்களை இந்த இசை நிச்சயம் கட்டிப்போடும் ... இதில் " அஞ்சலை " இல்லை ஆனால் " பெண்கள் என்றால் " இருக்கிறது . " ஹொசானா " இல்லை " சாய்ந்து சாய்ந்து இருக்கிறது. படத்தின் அனைத்து பாடல்களையும் நா.முத்துக்குமார் எழுதியுள்ளார் ... குறை என்று பார்த்தால் எட்டு பாடல்களையும் யுவன் , கார்த்திக் உட்பட சிலரே பாடியிருப்பதை தவிர்த்திருக்கலாம் . அதே போல எல்லா பாடல்களும் மெலடியாகவே இருப்பதால் வெரைட்டி இல்லாத ஒரு தோற்றத்தை கொடுக்கிறது , மற்றபடி படம் வெளிவந்த பிறகும் பாடல்கள் நீண்ட நாட்கள் மனதில் நிற்கும் என்பதில் சந்தேகமில்லை ... எனக்குப் பிடித்த வரிசையில் பாடல்களை அடுக்கியுள்ளேன் ...

1 .சாய்ந்து சாய்ந்து...

   யுவன்ஷங்கர் ராஜா / ரம்யா.என்.எஸ்.கே 

   யுவன் , ரம்யா குரலில் இளமை ததும்புகிறது . படத்தில் ஹைலைட்டே இந்த பாடல் தான் .

2. என்னோடு வா வா ...

    கார்த்திக் 

   கார்த்திக்கின் குரலும் , முத்துக்குமாரின் வரிகளும் புகுந்து விளையாடுகின்றன ... " காதலின் இலக்கணமே தன்னால் வரும்  

சின்ன சின்ன தலைக்கனமே " போன்ற வரிகள் காதலின் ஊடலை தத்ரூபமாய் சொல்கின்றன .

3. வானம் மெல்ல ...

    இளையராஜா / பெலா செண்டே  

   என்றுமே உடையாத குரல் இசைஞானியுடையது ... அவருடைய குரலில் பாடல் வசீகரித்தாலும் ஹரிஹரன் அல்லது மது பாலகிருஷ்ணன் இந்த பாடலி பாடியிருக்கலாம் என்பது என் கருத்து ... இயக்குனர் கேட்டுக் கொண்டதற்காகவே இந்த பாடலை இசைஞானி பாடினார் என்பது தகவல் .

4. முதல் முறை ...

    சுனிதி சௌஹான் 

   சுனிதி புதியவர் என்று நினைக்கிறேன்  , ஆனால் கேட்டவுடன் பற்றிக்கொள்ளும் குரல் ... பாடலின் பி.ஜி யும் , கோரஸும்  அருமை ... வழக்கம் போல இதிலும் ஒரு முறையோடு கோரஸை முடித்துக் கொண்டு 
ஏமாற்றமளிக்கிறார் இசைஞானி . பாடல் தேவதை படத்தின் " ஒருநாள் " பாடலை நினைவுபடுத்துகிறது ... 

5. பெண்கள் என்றால் ...

    யுவன்ஷங்கர் ராஜா 

   காதல் தோல்விப் பாடல் ... யுவனின் உருக்கும்  குரல் , " பெண்ணின் காதலின் அர்த்த்தமினி , புல்லின் மேல் தூங்கும் காலைப்பனி " போன்ற நா.முத்துக்குமாரின் வரிகளும் அருமை .

6. சற்று முன்பு ...

    ரம்யா என்.எஸ்.கே 

   கௌதமின் படங்களில் வரும் பெண் ஏக்கப் பாடல் ... கேட்க கேட்க பிடித்துப் போகும் பாடல் ... வாத்தியங்களின் ஆக்ரமிப்பை குறைத்திருந்தால் இன்னும் அருமையாக இருந்திருக்கும் ...

7. காற்றை கொஞ்சம் ...

    கார்த்திக் 

    வரிகளின் அளவிற்கு பாடல் உடனடியாக  கவரவில்லை ... படம் வந்த பிறகு ஹிட்டாகும் .

8. படிக்கல மாமு ...)

    சுராஜ் ஜகன் / கார்த்திக் 

     காலேஜ் கலாட்டா பாடல் ...  திருஷ்டி கழிக்கும் பாடல் என்று சொல்லலாம். படம் வந்த பிறகே தெரியும் ... 

   ( பின்குறிப்பு : இந்த பதிவை எழுதி முடித்தவுடனே எங்கிருந்தோ 

" நினைவெல்லாம் நித்யா " படத்திலிருந்து  " நீதானே என் பொன்வசந்தம் " பாடல் ஒலிக்க என்னையறியாமல் அதில் மூழ்கிப்போனேன் ) ஏ 

தமிழ் வலைப்பதிவர்கள் கவியரங்கம் - நட்பிற்கினியவளே ...!

வன்முறை இரண்டு பக்கமும் கூர்மையான ஆயுதம் என்றார் அறிஞர் அண்ணா ... என்னைப் பொறுத்த வரை கவியரங்கத்தில் கவிதை வாசிப்பதும் அது போலத்தான் ... கவிதை நன்றாக இருந்தால் பாராட்டு பெறலாம் இல்லையேல் கல்லடி தான் ... அதிலும் நமக்கு முன்பாக வாசித்தவர்களின் கவிதை சரியில்லை என்றால் நாம் வரும் போதே அரங்கத்தில் உள்ளவர்களின் கவனம் வேறு பக்கம் திரும்பி விடும் , அதே சமயம் அவர்கள் அருமையாக கவிதை வாசித்திருந்தால் நம் கவிதையும் அதற்கு ஈடு கொடுக்கும் படி இருக்க வேண்டும் , இல்லையேல் நாம் அம்பேல் ... ஏதோ ஒரு தைரியத்தில் நானும் எனது கவிதையை கவிதையை கவியரங்கத்தில் வாசிக்க முடிவு செய்தேன். ( எவ்வளவோ செஞ்சாச்சு இத செய்ய மாட்டோமா).
கேபிள் சங்கர் அவர்கள் வானமே வீழ்ந்தாலும் அவரது என்டர் கவிதையை படித்தே தீருவது என்று ஒற்றைக் காலில் நின்றதை பார்த்த போது எனக்கு மேலும் தைரியம் கூடியது ... மயிலன் கவிதைக்கு கிடைத்த வரவேற்பை பார்த்த போது எனக்கும் நம்பிக்கை பிறந்தது ...

எனக்கு அருகில் அமர்ந்திருந்தவர்களுடன் சேர்ந்து நானும் சில கவிதைகளை ஓட்டிக் கொண்டிருந்தேன் , பிறகு நானே கவிதை வாசிக்க போகிறேன் என்று தெரிந்த போது சுற்றியிருந்தவர்கள் சற்று அதிர்ச்சியுடன் என்னை ஒரு மாதிரி பார்த்து விட்டு எஸ்கேப் ஆக பார்த்தார்கள் ... கவிதை சரியில்லை என்றால் குவாட்டர் வாங்கித் தருகிறேன் என்றெல்லாம் சொல்லி அவர்களை ஒரு வழியாக சமாதானப்படுத்தி வைத்தேன் ... கவிதை என்ற பெயரில் நான் கிறுக்க ஆரம்பித்தது பத்தாவது படிக்கும் போது தான் ... மதுரை கல்லூரியல் படிக்கும் போது திருச்சி ஆர்.ஈ.சி கல்லூரியில் கணையாழி ஆசிரியர் திரு.ஞானக்கூத்தன் அவர்களின் தலைமையில் நடைபெற்ற அனைத்து கல்லூரிகளுக்கான கவிதைப் போட்டியில் " நட்பு " என்ற தலைப்பில் நான் வாசித்த எனது கவிதைக்கு முதல் பரிசு கிடைத்தது ... அதன் பிறகு எந்த ஒரு மேடையிலும் கவிதை வாசிப்பதற்க்காக நான் ஏறியதில்லை ...

இது வரை எனது வலையில் பத்துக்கும் மேற்ப்பட்ட கவிதைகளை பதிவிட்டிருக்கிறேன் ...அவற்றுள்  " நட்பிற்கினியவளே  " , " உண்மையை சொல்கிறேன் " ,  அல்லது " தனிமை " இந்த மூன்றில் எதையாவது ஒன்றை வாசிக்கலாம் என முடிவு செய்து அருகிலிருந்த நண்பர் நண்டு @ நொரண்டுவிடம் ( அவர் தான் பாக்க எதையும் தாங்கும் இதயம் போல தெரிஞ்சாரு )எனது மொபைல் போனில் டவுன்லோட் செய்திருந்த கவிதைகளை காண்பித்தேன்... அவர் படித்து விட்டு முதல் கவிதையை தேர்ந்தேடுத்ததோடு மூன்றுமே நன்றாக இருக்கின்றன என்று பாராட்டினார் ( என்ன பெருந்தன்மை ! ) ...ஒருவழியாக எனது கவிதையை பெரிய பாதிப்பு எதுவும் இல்லாமல் ( யாருக்கு , யாருக்கோ ) வாசித்து முடித்தேன் ... கவியரங்கத்தின் போது சக பதிவர் சசிகலா அவர்களின் " தென்றலின் கனவு " என்கிற கவிதை தொகுப்பும்  பிரபல எழுத்தாளர் பி.கே.பி அவர்களின் முன்னிலையில் வெளியிடப்பட்டது ... மொபைல் போன் மூலம் கவிதை வாசித்ததை திரு.பி.கே.பி அவர்கள் தன் உரையின் போது நினைவு கூர்ந்தார்... இந்த கவிதையை தேர்ந்தெடுத்த ராஜசேகர் ( நண்டு @ நொரண்டு ) , படிக்க சொல்லி ஊக்கமளித்த கடம்பவன் ,  நான் கவிதை வாசிக்கும் போது  அதை படம் பிடித்து ட்விட்டருக்கும் அனுப்பி வைத்த சி.பி.செந்தில்குமார்  ஆகிய அனைவருக்கும் எனது மனமார்ந்த நன்றிகள் . இதோ உங்களுக்காக ( எதுக்கு இந்த பில்ட் அப் ! ) ...

                                                                        நட்பிற்கினியவளே ...!

வகுப்பறையில்

வேற்று கிரக வாசிகள் போல்

ஆண்களும் பெண்களும்

வெறுமையாய் அமர்ந்திருக்க

பார்வையிலேயே புரிந்து கொண்டு

கை குலுக்களில்

தொடங்கியது

நம் நட்பு....

நான்கே நாட்களில்

புரிந்து விட்டது

நட்பிற்கினியவள்

நீயென்று....

எவன் சொன்னது ?

பெண்ணின் மனது

பெண்ணிற்குத் தான்

தெரியுமென்று..

மௌனத்தில் நீயிருந்தும்

உன்

மனதைப் படிப்பதில்

சிறந்தவர்

எனைத் தவிர

வேறெவரும் உண்டா ?...

நம் நட்பு

உயிர் வாழ

நாம் சந்தித்த

சங்கடங்கள் பல

ஆனால்

நம் மனதில்

சஞ்சலங்கள் இருந்ததில்லை...

                                       

எனக்கு

இளையராஜா பிடிக்கும்

உனக்கு ஏ.ஆர்.ரஹ்மான்...

மதில் சுவரில் அமர்ந்து

மணிக்கணக்கில் 

சண்டைகள் போட்டிருக்கிறோம்...

என்

பிறந்த நாளில்

உன் பரிசாக

கைகளில் தவழ்ந்தது

இசைஞானியின் இசை பேழை...

சுயநலம் மறந்தும்

சுயத்தை இழக்கவில்லை...

வெட்கத்துடன்

திருமண அழைப்பிதழ்
கொடுத்த போது தான்
நீ
பெண் என்பதை
நான் உணர்ந்தேன்...

அதை

என் மூலம் கொடுத்து
ஊர் வாயை அடைத்தாய்...


என் காதலுக்கு

தூது போனவள்

நீ..

நம் நட்பை

கொச்சைப்படுத்திய காதலையே

தூக்கியெறிந்தவன்   நான்...

இன்று அவள்

எங்கே இருக்கிறாள்

தெரியவில்லை...

இத்தனை வருடங்கள்

ஆனாலும்

வாசம் மாறாமல்

வீசிக் கொண்டிருக்கிறது

நம் நட்பு...